ముదిరాజ్ లను బీసీ(ఏ ) లో చేర్చవద్దు ..

హిమాయత్ నగర్, మేజర్ న్యూస్ :బీసీ-డీలో ఉన్న ముదిరాజ్ లను బీసీ-ఏ గ్రూపులో చేర్చేందుకు ప్రభుత్వం చేస్తున్న ప్రయత్నాలను వెంటనే విరమించుకోవాలని బీసీ-ఏ కులాల హక్కుల పరిరక్షణ సమితి వ్యవస్థాపక అధ్యక్షుడు ప్రొఫెసర్ ఎ. భాగయ్య, రాష్ట్ర అధ్యక్షుడు గడప శ్రీహరి డిమాండ్ చేశారు. శుక్రవారం బషీర్బాగ్ ప్రెస్ క్లబ్లో ఏర్పాటు చేసిన విలేకరుల సమావేశంలో బీసీ-ఏ గ్రూపులోని కులాల ప్రతినిధులతో కలిసి వారు మాట్లాడుతూ, బీసీ-ఏలో ఉన్న 57 కులాలు యాచక, సేవా వృత్తులపై ఆధారపడుతూ జీవనం సాగుతున్నారని… జనాభా, రాజకీయ ప్రాబల్యం ఉన్న ముదిరాజ్ లను ఇందులో కలిపితే తమ పిల్లల భవిష్యత్తు అందకారమవుతుందని ఆందోళన వ్యక్తం చేశారు. 

గతంలో అనంతరామన్ కమిషన్ క్షేత్రస్థాయి పరిశీలన తర్వాతే బీసీ-ఏ గ్రూపును ఏర్పాటు చేసిందని, ఇప్పుడు ఓటు బ్యాంకు రాజకీల కోసం శాస్త్రయత లేకుండా జీవోలు ఇవ్వడం సరికాదని అన్నారు. ముదిరాజ్ లకు ప్రత్యేక కార్పొరేషన్ ఇవ్వాలని, లేదా బీసీ-ఈ గ్రూపులో చేర్చాలని సూచించారు. దశాబ్దాలుగా పెండింగ్లో ఉన్న తమ ఎస్టీ వర్గీకరణ డిమాండ్ ను పరిష్కరించిన తర్వాతే ఇతర కులాల మార్పులు, చేర్పులను చేపట్టాలని అన్నారు. ప్రభుత్వం ముదిరాజ్ కులాన్ని బీసీ-ఏ గ్రూపులో చేర్చాలనే ప్రయత్నాన్ని విరమించుకోక పోతే రాష్ట్ర వ్యాప్తంగా ధర్నాలు, కలెక్టరేట్ల ముట్టడి, రాస్తారోకోలు చేపడతామని హెచ్చరించారు. కార్యక్రమంలో బీసీ-ఏ కులాల నేతలు టి.నారాయణ, కంటే రాంచందర్, అంబటి సుధాకర్, డాక్టర్ మురళీమోహన్, అడ్వకేట్ శాంతప్ప, గుడబోయిన శివరత్నం, రాస్కాస్ భగవాన్, చుక్కల రామస్వామి, గరిగబోయిన మల్లేష్, ఏరువా బాలయ్య తదితరులు పాల్గొన్నారు.