కాపులంతా ఎన్డీఏ కూటమి వైపే

నేటి దినపత్రిక సూర్య బ్యూరో రాజమహేంద్రవరంశ్రీకాకుళం నుంచి అనంతపురం వరకు రాష్ట్రవ్యాప్తంగా కాపు సామాజిక వర్గం ఎన్డీఏ కూటమికి మద్దతుగా ఉందని రాష్ట్ర కాపు జేఏసీ కన్వీనర్ ఆరేటి ప్రకాష్ అన్నారు. అంబేద్కర్ కోనసీమ జిల్లాలో జరుగుతున్న స్థానిక సంస్థల ఎన్నికల్లో మున్సిపల్, జడ్పీటీసీ, ఎంపీటీసీ స్థానాల్లో ఎన్డీఏ కూటమి విజయంపై ఆయన ధీమా వ్యక్తం చేశారు. శుక్రవారం అమలాపురంలో నిర్వహించిన మీడియా సమావేశంలో ఆయన మాట్లాడారు.

మహాత్మా గాంధీ కలలుగన్న గ్రామ స్వరాజ్య సాధనే లక్ష్యంగా ఉపముఖ్యమంత్రి పవన్ కళ్యాణ్ అభివృద్ధి దిశగా కృషి చేస్తున్నారని ఆరేటి ప్రకాష్ పేర్కొన్నారు. గ్రామీణ ప్రాంతాల అభివృద్ధి, ప్రజల సంక్షేమమే లక్ష్యంగా కూటమి ప్రభుత్వం ముందుకు సాగుతోందని అన్నారు.

గత వైసీపీ ప్రభుత్వ హయాంలో స్థానిక సంస్థల ఎన్నికల సందర్భంగా ఏకగ్రీవాల కోసం అరాచకాలకు పాల్పడ్డారని ఆయన ఆరోపించారు. ప్రస్తుతం జరుగుతున్న స్థానిక సంస్థల ఎన్నికల్లోనూ అలాంటి కుట్రలకు ప్రయత్నిస్తున్నారని విమర్శించారు. ఎన్నికలు పూర్తిగా ప్రజాస్వామ్యబద్ధంగా జరగాలని, ప్రజల అభిప్రాయమే ఎన్నికల్లో కీలకం కావాలని స్పష్టం చేశారు.

కాపు సామాజిక వర్గం ఎన్డీఏ కూటమి ప్రభుత్వానికి అండగా నిలుస్తోందని, రాబోయే స్థానిక సంస్థల ఎన్నికల్లోనూ కూటమి అభ్యర్థులకు ప్రజల మద్దతు లభిస్తుందని ఆయన విశ్వాసం వ్యక్తం చేశారు. మున్సిపాలిటీలు, జడ్పీటీసీ, ఎంపీటీసీ స్థానాల్లో ఎన్డీఏ కూటమి విజయమే లక్ష్యంగా ముందుకు సాగుతున్నామని ఆరేటి ప్రకాష్ తెలిపారు. ఈ కార్యక్రమంలో తెలుగుదేశం పార్టీ జిల్లా కార్యదర్శి గంధం పల్లం  రాజు, తెలుగుదేశం పార్టీ నాయకులు చిక్కాల గణేష్, కొమ్ముల సురేష్, మహమ్మద్ ఇర్ఫాన్, కొరసాల సురేష్ నాయుడు, చింతలపూడి సత్తిబాబు, చిక్కల ముద్దు బాబు, తిక్కి రెడ్డి వాసు, యిండి గల ఆనంద్, బావిశెట్టి నాగబాబు తదితరు పాల్గొన్నారు.             రంబాల నాగసత్య నారాయణ అమలాపురం