పట్టభద్రుల ఎన్నికలతో కాంగ్రెస్ ప్రభుత్వానికి తగిన బుద్ధి చెబుతాం - ఖైరతాబాద్ నియోజకవర్గ బీఆర్ఎస్ పార్టీ ఇంచార్జ్ మన్నె గోవర్ధన్ రెడ్డి

తెలంగాణ బ్యూరో , ప్రతినిధి : మహబూబ్‌నగర్–రంగారెడ్డి–హైదరాబాద్ పట్టభద్రుల శాసన మండలి ఎన్నికలు రాష్ట్ర భవిష్యత్తుకు దిశానిర్దేశం చేసే కీలక ఎన్నికలని ఖైరతాబాద్ నియోజకవర్గ బీఆర్ఎస్ పార్టీ ఇంచార్జ్ మన్నె గోవర్ధన్ రెడ్డి (ఎమ్ జీ ఆర్ ) అన్నారు. పట్టభద్రుల ఓటరు నమోదు కార్యక్రమంలో భాగంగా ఫిల్మ్ నగర్ డివిజన్ పరిధిలోని ఎమ్ ఆర్ సీ  కాలనీ, బీ జే ఆర్  నగర్‌లో పట్టభద్రులకు దరఖాస్తు ఫారాలను ఎమ్ జీ ఆర్  పంపిణీ చేశారు. 

ఈ సందర్భంగా ఎమ్ జీ ఆర్ మాట్లాడుతూ, కాంగ్రెస్ ప్రభుత్వం అధికారంలోకి వచ్చిన తర్వాత ప్రజలకు ఇచ్చిన హామీలను అమలు చేయడంలో విఫలమైందని విమర్శించారు. ప్రభుత్వ మూడేళ్ల పాలనపై పట్టభద్రులు తమ తీర్పు ఇచ్చే సమయం ఆసన్నమైందని, రాబోయే పట్టభద్రుల ఎన్నికలు కాంగ్రెస్ ప్రభుత్వానికి ప్రజాభిప్రాయ పరీక్షగా నిలవనున్నాయని పేర్కొన్నారు. విద్యావంతులు, నిరుద్యోగ యువత, మేధావులు తమ ఓటు హక్కును బాధ్యతగా వినియోగించుకుని ప్రజా సమస్యలపై స్పందించాలని పిలుపునిచ్చారు. 

ఆరు గ్యారెంటీలు, 420 హామీల పేరుతో అధికారంలోకి వచ్చిన కాంగ్రెస్ ప్రభుత్వం అన్ని వర్గాల ప్రజలను నిరాశకు గురిచేసిందని ఆరోపించారు. పట్టభద్రులంతా ఓటరు నమోదును పూర్తి చేసుకుని ప్రజల పక్షాన నిలిచే అభ్యర్థులకు మద్దతు ఇవ్వాలని ఎమ్ జీ ఆర్  కోరారు. రానున్న పట్టభద్రుల ఎన్నికల్లో కాంగ్రెస్ ప్రభుత్వానికి గట్టి రాజకీయ సమాధానం లభించడం ఖాయమని ఆయన ధీమా వ్యక్తం చేశారు. ఈ కార్యక్రమం లో వెంకీ ముదిరాజ్, సైదులు,జ్యోతి స్వరూప్, తేజ, నవీన్, తరుణ్, సంతు, వరుణ్, తదితరులు పాల్గొన్నారు.