జాతీయ స్థాయి రోల్ ప్లే పోటీలకు ఈదులవలస పీఎం శ్రీ పాఠశాల విద్యార్థులు

పోలాకి,  సూర్య : జాతీయ స్థాయి రోల్ ప్లే పోటీల్లో భాగంగా నిర్వహించిన జిల్లా స్థాయి పోటీల్లో పీఎం శ్రీ ఏపీఎంఎస్ ఈదులవలస పాఠశాల విద్యార్థులు అద్భుత ప్రతిభ కనబరిచి ప్రథమ బహుమతిని కైవసం చేసుకున్నారు. తమ సృజనాత్మకత, విషయ పరిజ్ఞానం, చక్కటి అభినయం, సమయస్ఫూర్తితో కూడిన ప్రదర్శనతో న్యాయనిర్ణేతలను ఆకట్టుకుని జిల్లా స్థాయిలో విజేతలుగా నిలిచారు. ఈ విజయంతో విద్యార్థులు రాష్ట్ర స్థాయి రోల్ ప్లే పోటీలకు ఎంపికై పాఠశాలకు ప్రత్యేక గుర్తింపు తీసుకొచ్చారు. విద్యార్థుల్లో దాగి ఉన్న ప్రతిభను వెలికితీసి, పోటీలకు అవసరమైన శిక్షణ అందించడంలో గైడ్ టీచర్ జె. కృష్ణారావు (టీజీటీ ఇంగ్లీష్) విశేష కృషి చేశారు. ఈ సందర్భంగా పాఠశాల ప్రిన్సిపాల్ పి. ప్రవీణ, ఉపాధ్యాయ బృందం గైడ్ టీచర్ జె. కృష్ణారావును, విజేతలైన విద్యార్థులను ప్రత్యేకంగా అభినందించారు. ఇదే స్ఫూర్తితో రాష్ట్ర స్థాయి పోటీల్లోనూ ప్రతిభ చాటుకుని జాతీయ స్థాయికి చేరుకోవాలని ఆకాంక్షించారు. జిల్లా స్థాయిలో సాధించిన ఈ విజయం పాఠశాల ఉపాధ్యాయులు, విద్యార్థులు, తల్లిదండ్రుల్లో ఆనందోత్సాహాలు నింపింది.