గ్రామీణ రోడ్లకు మోక్షం ఎప్పుడో..? మర్రిపాడులో అధ్వాన్నంగా రహదారులు

మర్రిపాడు, మేజర్ న్యూస్ :   మర్రిపాడు మండలంలో గ్రామీణ రహదారులు అధ్వాన్నంగా మారాయి. దీంతో ప్రయాణికులు, వాహన చోదకులు నానా అవస్థలు పడుతున్నారు. మండలంలో ఏ పల్లెకు వెళదామన్న మోకాల్లోతు గుంతలతో రహదారులు దర్శనమిస్తున్నాయి. రహదారులు నిర్మించి ఏళ్లు గడుస్తున్నా ప్యాచ్ పనులు కూడా చేయకపోవడంతో ఈ పరిస్థితి నెలకొంది. ఇటీవల కురిసిన తుఫానుల కారణంగా రహదారులు మరింతగా దెబ్బతిని దర్శనమిస్తున్నాయి. అందుకు సంబంధించిన అధికారులు పాలకులు పట్టించుకోకపోవడంతో ఈ రహదారులకు మోక్షం ఎప్పుడోనని పలువురు చర్చించుకుంటున్నారు. వివరాల్లోకి వెళితే..
                   మర్రిపాడు మండలంలోని పలు గ్రామాలకు వెళ్లే రహదారులు అద్వాన్నంగా తయారై దర్శనమిస్తుండడంతో అటు వాహన చోదకులకు ఇటు ప్రయాణికులకు ఇబ్బందులు తప్పడం లేదు. ఫలితంగా ప్రమాదాలు కూడా సంభవిస్తుండడంతో రహదారుల్లో ప్రయాణించాలంటే హడలెత్తిపోతున్నారు. గత ఐదేళ్ల నుంచి ఆ రహదారులకు కనీసం మరమ్మతులు కూడా చేసిన పాపాన పోకపోవడంతో మోకాల్లోతు  గుంతలతో దర్శనమిస్తున్నాయి. మర్రిపాడు మండలంలో ప్రధానంగా సింగనపల్లి, కంపసముద్రం, పెగళ్లపాడు పల్లవోలు, వెంకటాపురం, మర్రిపాడు నుండి చిలకపాడు మీదుగా ఉదయగిరికి వెళ్లే రహదారితో పాటు పడమటి నాయుడుపల్లి, ఇర్లపాడు, భీమవరం, తదితర గ్రామాలకు వెళ్లే రహదారులు మరింత దారుణంగా తయారయ్యాయి. గత పది ఏళ్ల క్రితం నిర్మించిన ఈ రహదారులు నేడు గుంతలమయంతో దర్శనం ఇస్తున్నాయి. నిర్మించిన నాటి నుంచి నేటికీ ఆ రహదారులు వైపు కన్నెత్తిన చూసిన నాథుడే లేడు. దీంతో మరమ్మత్తులు కూడా నోచుకోలేదు. ఫలితంగా ప్రయాణికులు వాహన చోదకులు నానా అవస్థలు పడుతూ ప్రయాణించాల్సిన పరిస్థితి నెలకొంది. ఈ రహదారుల్లో బస్సు సౌకర్యం పెద్దగా లేనందున ద్విచక్ర వాహనాలతో పాటు ఆటోలు ఎక్కువగా నడుస్తుంటాయి. దీంతో ఏ గుంతలో ఏ టైరు పడి ప్రమాదం సంభవిస్తుందోనని భయాందోళన చెందుతూ ప్రయాణించాల్సిన పరిస్థితి నెలకొంది. గ్రామాల్లో సీసీ రోడ్లకు ప్రాధాన్యం ఇచ్చారు తప్ప ప్రధాన రహదారులను మరిచారు. దీంతో ప్రయాణం నరకయాతన అయింది. ఇప్పటికైనా సంబంధిత అధికారులు పాలకులు పట్టించుకోని రహదారులకు మరమ్మత్తులు చేయించడం గానీ లేక నూతన రహదారులు నిర్మించడం కానీ చేయాలని మండల ప్రజలు కోరుతున్నారు.