ఆత్మకూరు చెరువులో ఘనంగా వరుణ హోమం - వర్షాలు కురవాలని రైతుల ప్రత్యేక పూజలు

ఆత్మకూరు, మేజర్ న్యూస్ :    వర్షాలు సమృద్ధిగా కురిసి రైతుల పంటలు సుభిక్షంగా పండాలని ఆకాంక్షిస్తూ ఆత్మకూరు రైతుల ఆధ్వర్యంలో ఆదివారం వరుణ యాగం, హోమం, బెల్లం పంపిణీ కార్యక్రమాన్ని సంప్రదాయబద్ధంగా ఘనంగా నిర్వహించారు.   ఆత్మకూరులోని సత్రం సమీపంలో ఉన్న అంకమ్మ మాను వద్ద హనుమంతునికి ప్రత్యేక పూజలు నిర్వహించి, అక్కడి నుంచి హనుమంతుని ఉత్సవ విగ్రహంతో డప్పు వాయిద్యాలు, భాజాభజంత్రీల నడుమ భారీ ఊరేగింపు చేపట్టారు. ఈ ఊరేగింపు పట్టణ పురవీధుల గుండా సాగి ఆత్మకూరు చెరువు వద్దకు చేరుకుంది.ఈ కార్యక్రమంలో మున్సిపల్ చైర్‌పర్సన్‌గా ఎన్నికైన డాక్టర్ బొమ్మిరెడ్డి షకీలా, ఆమె తనయుడు, యువనేత, బి ఎస్ ఆర్ ట్రస్ట్ చైర్మన్ బొమ్మిరెడ్డి తారకనాథ్ రెడ్డి పాల్గొని కొబ్బరికాయలు కొట్టి మొక్కులు చెల్లించుకున్నారు. అనంతరం చెరువు వద్ద ప్రత్యేక హోమం నిర్వహించి వరుణ దేవుడికి పూజలు చేశారు. వర్షాలు సమృద్ధిగా కురిసి చెరువులు, కాలువలు నీటితో కళకళలాడాలని, రైతులకు సాగునీటి ఇబ్బందులు తొలగి పంటలు పుష్కలంగా పండాలని ప్రార్థించారు.
7 సంవత్సరాల క్రితం ఇదే విధంగా వరుణ దేవుడికి ప్రత్యేక పూజలు నిర్వహించామని, తిరిగి ఇప్పుడు సంప్రదాయబద్ధంగా వరుణ యాగం, హోమం నిర్వహిస్తున్నామని రైతులు తెలిపారు. వరుణ దేవుడి కరుణతో ఈ ఏడాది సమృద్ధిగా వర్షాలు కురిసి పంటలు బాగా పండుతాయని ఆశాభావం వ్యక్తం చేశారు.  ఈ కార్యక్రమంలో పెద్ద సంఖ్యలో రైతులు, స్థానిక ప్రజలు పాల్గొని ప్రత్యేక పూజలు నిర్వహించారు.