గ్రామ గ్రామాన అభివృద్ధి.. గడపగడపకు సంక్షేమం స్థానిక ఎన్నికల్లో కూటమి అభ్యర్థుల విజయమే లక్ష్యం: మంత్రి నిమ్మల రామానాయుడు

పాలకొల్లు, మేజర్ న్యూస్ ప్రభుత్వం అధికారంలోకి వచ్చిన రెండున్నరేళ్లలో పాలకొల్లు నియోజకవర్గంలో చేపట్టిన అభివృద్ధి పనులు, ప్రజలకు అందించిన సంక్షేమ పథకాలను గడపగడపకు తీసుకువెళ్లాలని రాష్ట్ర జలవనరుల శాఖ మంత్రి డాక్టర్ నిమ్మల రామానాయుడు కూటమి నాయకులు, కార్యకర్తలకు పిలుపునిచ్చారు. రానున్న స్థానిక సంస్థల ఎన్నికల్లో ఎంపీటీసీ, జడ్పీటీసీ అభ్యర్థుల విజయమే లక్ష్యంగా ఐకమత్యంతో పనిచేయాలని సూచించారు.పాలకొల్లులోని తన కార్యాలయంలో కూటమి ముఖ్య నాయకులు, శ్రేణులతో నిర్వహించిన సమావేశంలో మంత్రి మాట్లాడుతూ, రాష్ట్ర ఆర్థిక పరిస్థితి ఇబ్బందికరంగా ఉన్నప్పటికీ నియోజకవర్గ అభివృద్ధికి ప్రాధాన్యమిస్తూ సుమారు రూ.1,200 కోట్ల నిధులతో వివిధ అభివృద్ధి పనులు చేపట్టినట్లు తెలిపారు. ప్రతి గ్రామంలో సిమెంట్ రహదారులు, సిమెంట్ డ్రైన్లు, రైతులకు ఉపయోగపడే పుంత రహదారులు, మంచినీటి పథకాల అభివృద్ధికి ప్రాధాన్యం ఇచ్చినట్లు వివరించారు.గ్రామీణ ప్రాంతాల్లో ప్రజలు, రైతులు ఎదుర్కొంటున్న సమస్యలను గుర్తించి పరిష్కారానికి చర్యలు తీసుకుంటున్నామని, దీర్ఘకాలంగా పెండింగ్‌లో ఉన్న సమస్యలను ఒక్కొక్కటిగా పరిష్కరిస్తూ గ్రామాల అభివృద్ధిని ప్రణాళికాబద్ధంగా ముందుకు తీసుకువెళ్తున్నామని మంత్రి పేర్కొన్నారు. ఇప్పటికే పూర్తయిన పనులతో పాటు భవిష్యత్తులో చేపట్టనున్న కార్యక్రమాలను కూడా ప్రజలకు వివరించాలని నాయకులకు సూచించారు.గ్రామాలవారీగా జరిగిన అభివృద్ధి, ప్రజలకు అందిన సంక్షేమ ప్రయోజనాలపై కూటమి నాయకులు, కార్యకర్తలు పూర్తి అవగాహన కలిగి ఉండాలని నిమ్మల రామానాయుడు అన్నారు. ప్రజల సమస్యలను తెలుసుకుంటూ వారికి అందుబాటులో ఉండాలని, అభివృద్ధి, సంక్షేమ పథకాల వివరాలను ప్రజల్లోకి తీసుకువెళ్లాలని కోరారు.స్థానిక సంస్థల ఎన్నికల్లో అభివృద్ధి, సంక్షేమమే కూటమి అభ్యర్థులకు ప్రధాన బలమని మంత్రి పేర్కొన్నారు. అన్ని వర్గాల ప్రజల మద్దతు కూడగట్టేలా కూటమిలోని అన్ని పార్టీల నాయకులు, కార్యకర్తలు సమన్వయంతో పనిచేయాలని పిలుపునిచ్చారు. పాలకొల్లు నియోజకవర్గాన్ని మరింత అభివృద్ధి పథంలో నడిపించేందుకు ప్రజల భాగస్వామ్యం కీలకమని, రానున్న ఎంపీటీసీ, జడ్పీటీసీ ఎన్నికల్లో కూటమి అభ్యర్థుల విజయానికి ప్రతి ఒక్కరూ కృషి చేయాలని మంత్రి నిమ్మల రామానాయుడు కోరారు.