గోదావరి పుష్కరాలకు ప్రత్యేక ప్రణాళిక సిద్ధం చేయాలి

నేటి దినపత్రిక సూర్య బ్యూరో రాజమహేంద్రవరం

రాజమహేంద్రవరం డివిజన్ సబ్‌ కలెక్టర్ శుభం నోఖ్వాల్ గురువారం మధ్యాహ్నం సబ్‌ కలెక్టర్ కార్యాలయంలో 2027 గోదావరి పుష్కరాల సన్నాహకాలపై సమావేశం నిర్వహించారు. పుష్కరాల ప్రత్యేక ఉప కలెక్టర్ (ఎస్‌డీసీ) మహేష్‌తో పాటు రాజమహేంద్రవరం అర్బన్, రాజమహేంద్రవరం రూరల్, రాజానగరం, కడియం, సీతానగరం, కోరుకొండ మండలాల తహసీల్దార్లు పాల్గొన్నారు.

నూతనంగా బాధ్యతలు చేపట్టిన నేపథ్యంలో పుష్కరాల నిర్వహణకు సంబంధించి భవిష్యత్ కార్యాచరణ, క్షేత్రస్థాయిలో చేపట్టాల్సిన పనులు, ప్రతిపాదిత అభివృద్ధి కార్యక్రమాలు, ఆర్థిక, ఆర్థికేతర అంశాలపై సబ్‌ కలెక్టర్ శుభం నోక్వాల్ అంశాల వారిగా అధికారులతో చర్చించారు. మండలాల పరిధిలోని పుష్కర ఘాట్లు, ప్రముఖ దేవాలయాలు, పర్యాటక ప్రాంతాల ప్రస్తుత పరిస్థితులు, అందుబాటులో ఉన్న మౌలిక సదుపాయాలు, గుర్తించిన సమస్యలపై వివరాలు తెలుసుకున్నారు. శుభం నోక్వాల్ మాట్లాడుతూ, గత పుష్కరాల సమయంలో యాత్రికుల రాక, 2027 పుష్కరాలకు వచ్చే భక్తుల సంఖ్యపై అంచనాలు, వారికి అవసరమైన సౌకర్యాల కల్పనపై సమగ్ర నివేదిక అందించాలని ఆదేశించారు. ఘాట్ల వద్ద స్నాన సదుపాయాలు, రహదారులు, పారిశుద్ధ్యం, తాగునీరు, విద్యుత్, రవాణా, భద్రత వంటి అంశాల్లో అవసరమైన పనులను గుర్తించి, మండలాల వారీగా ప్రతిపాదనలు సిద్ధం చేయడంపై దృష్టి సారించాలన్నారు. ఆర్థిక, ఆర్థికేతర సమస్యలను గుర్తించి, సంబంధిత శాఖల సమన్వయంతో ముందస్తు ప్రణాళిక రూపొందించి పుష్కరాల ఏర్పాట్లకు సన్నద్ధం కావాలని కార్యాచరణ అంశాలను చర్చించినట్లు తెలిపారు.