వ్యవసాయ రంగ అభివృద్ధిలో మహిళా రైతుల పాత్ర కీలకం: డీఏవో చంద్రకళ

మేడ్చల్ జిల్లా ప్రతినిధి, మేజర్ న్యూస్: వ్యవసాయ రంగ అభివృద్ధిలో మహిళా రైతుల పాత్ర కీలకమని జిల్లా వ్యవసాయ అధికారిణి కె. చంద్రకళ అన్నారు. అంతర్జాతీయ మహిళా రైతుల దినోత్సవాన్ని పురస్కరించుకుని గురువారం మేడ్చల్ జిల్లా కలెక్టరేట్ ఆవరణలోని జిల్లా వ్యవసాయ అధికారి కార్యాలయంలో నిర్వహించిన వేడుకల్లో ఆమె ముఖ్య అతిథిగా పాల్గొన్నారు. ఈ సందర్భంగా వ్యవసాయ రంగంలో విశేష కృషి చేస్తున్న ఉత్తమ మహిళా రైతులను ఘనంగా సత్కరించారు.ఈ సందర్భంగా చంద్రకళ మాట్లాడుతూ.. విత్తనాల ఎంపిక, పంటల సాగు, ఎరువుల వినియోగం, సస్యరక్షణ తదితర వ్యవసాయ పనుల్లో మహిళా రైతులు అందిస్తున్న సేవలు అభినందనీయమని కొనియాడారు. వ్యవసాయ రంగంలో మహిళలు కీలక పాత్ర పోషిస్తూ గ్రామీణ ఆర్థిక వ్యవస్థ బలోపేతానికి తోడ్పడుతున్నారని పేర్కొన్నారు. మహిళా రైతులు ఆధునిక వ్యవసాయ పద్ధతులు, సాంకేతిక పరిజ్ఞానాన్ని అందిపుచ్చుకోవాలని సూచించారు. ప్రభుత్వం అందిస్తున్న వ్యవసాయ పథకాలను సద్వినియోగం చేసుకుని ఆర్థికంగా మరింత బలోపేతం కావాలని పిలుపునిచ్చారు.అనంతరం వ్యవసాయ రంగంలో విశేష సేవలందిస్తున్న సరసం లక్ష్మి, వంగేటి సమత, బాలమణితో పాటు పలువురు మహిళా రైతులను శాలువాలు, పూలమాలలతో సత్కరించి అభినందించారు.ఈ కార్యక్రమంలో ఏఓ, అగ్రికల్చర్ టెక్నికల్ ఆఫీసర్ శిరీష, వ్యవసాయ శాఖ అధికారులు, సిబ్బంది, స్థానిక రైతులు పాల్గొన్నారు.

రిపోర్టర్: పన్నాల బాల్ రెడ్డి, మేడ్చల్ జిల్లా ప్రతినిధి.