తాడిపత్రికి పోలీస్‌ కవచం ఎన్నికల వేళ పట్టణ సరిహద్దుల్లో ఏడు చెక్‌పోస్టులు ఏర్పాటు అక్రమ నగదు, మద్యం రవాణాపై ప్రత్యేక నిఘా.. 24 గంటల పాటు వాహనాల తనిఖీలు
అనంతపురం బ్యూరో (అనంతపురం బ్యూరో మేజర్ న్యూస్) : మున్సిపల్ ఎన్నికల నేపథ్యంలో తాడిపత్రి పట్టణంలో శాంతిభద్రతల పరిరక్షణకు జిల్లా పోలీసు యంత్రాంగం ప్రత్యేక చర్యలు చేపట్టింది. ఎన్నికలు ప్రశాంతంగా, పారదర్శకంగా నిర్వహించడమే లక్ష్యంగా జిల్లా ఎస్పీ పి. జగదీష్, ఐపీఎస్‌ ఆదేశాల మేరకు పట్టణ సరిహద్దులు, శివారు ప్రాంతాల్లో ఏడు ఎన్నికల చెక్‌పోస్టులను ఏర్పాటు చేశారు. ఎన్నికల సమయంలో అక్రమ నగదు, మద్యం రవాణాను అరికట్టడంతో పాటు అసాంఘిక కార్యకలాపాలకు అడ్డుకట్ట వేసేందుకు పటిష్ట నిఘా ఏర్పాటు చేశారు.
24 గంటల పాటు వాహనాల తనిఖీలు
తాడిపత్రి డీఎస్పీ ఎం. చంద్రశేఖర్ పర్యవేక్షణలో అర్బన్ సీఐ ఆరోహణరావు, రూరల్ సీఐ నారాయణరెడ్డి ఆధ్వర్యంలో పోలీసు బృందాలు చెక్‌పోస్టుల వద్ద విధులు నిర్వహిస్తున్నాయి. పట్టణంలోకి ప్రవేశించే, బయటకు వెళ్లే వాహనాలను నిరంతరం తనిఖీ చేస్తున్నారు. డిజిటల్, మాన్యువల్ పద్ధతుల్లో తనిఖీలు చేపడుతూ అనుమానాస్పద వ్యక్తులు, వాహనాలపై ప్రత్యేక దృష్టి సారించారు. నగదు, మద్యం, ఇతర ప్రలోభాల వస్తువుల అక్రమ రవాణా జరగకుండా అప్రమత్తంగా వ్యవహరిస్తున్నారు.
ఈ ప్రాంతాల్లో చెక్‌పోస్టులు
తాడిపత్రి పట్టణానికి వచ్చే ప్రధాన మార్గాలను గుర్తించి ఏడు కీలక ప్రాంతాల్లో చెక్‌పోస్టులను ఏర్పాటు చేశారు.
1. నందలపాడు – అనంతపురం ప్రధాన రహదారి
2. పుట్లూరు రైల్వే గేటు
3. యల్లనూరు రైల్వే గేటు
4. కడప రోడ్డులో నిర్మాణంలో ఉన్న కొత్త వంతెన వద్ద
5. సజ్జలదిన్నె క్రాస్
6. చుక్కలూరు క్రాస్
7. పెద్దపప్పూరు రోడ్డులోని సాయిబాబా ఆలయం సమీపంలో
ఈ ప్రాంతాల ద్వారా పట్టణంలోకి వచ్చే వాహనాలపై నిరంతర నిఘా ఉంచేలా పోలీసు అధికారులు కార్యాచరణ రూపొందించారు.
నిబంధనలు ఉల్లంఘిస్తే కఠిన చర్యలు
ఎన్నికల నియమావళిని ఉల్లంఘించి ఓటర్లను ప్రలోభపెట్టేందుకు అక్రమంగా నగదు, మద్యం తరలించినా, పట్టణంలో శాంతిభద్రతలకు విఘాతం కలిగించేందుకు ప్రయత్నించినా కఠిన చర్యలు తీసుకుంటామని డీఎస్పీ ఎం. చంద్రశేఖర్ హెచ్చరించారు. నిబంధనలకు విరుద్ధంగా వ్యవహరించే వారిపై కేసులు నమోదు చేయడంతో పాటు, చట్టప్రకారం సంబంధిత వస్తువులు, వాహనాలపై చర్యలు తీసుకుంటామని స్పష్టం చేశారు.
ఎన్నికలు నిష్పక్షపాతంగా, ప్రశాంత వాతావరణంలో జరిగేందుకు ప్రజలు పోలీసులకు సహకరించాలని ఆయన విజ్ఞప్తి చేశారు. ఎన్నికల సమయంలో ఎలాంటి అవాంఛనీయ ఘటనలు చోటుచేసుకోకుండా తాడిపత్రిపై ప్రత్యేక నిఘా కొనసాగుతోందని పోలీసు అధికారులు తెలిపారు.
రిపోర్టర్ : మొయినుద్దీన్, అనంతపురం బ్యూరో, అనంతపురం.
