గంగడ గ్రామంలో మూడు చేపల చెరువులకు గండి

*భారీగా లభ్యత నష్టం, రూ. 1.90 లక్షల మేర నష్టం*

​బలిజిపేట, సెప్టెంబర్ 24 మేజర్ న్యూస్.... పార్వతీపురం మన్యం జిల్లా కలెక్టర్ డా ఎన్. ప్రభాకర రెడ్డి ఆదేశాల మేరకు మత్స్య శాఖ అధికారులు చేపట్టిన ప్రాథమిక సర్వేలో బలిజిపేట మండలం గంగడ గ్రామంలో భారీగా మత్స్య సంపద నష్టపోయినట్లు తెలిసింది. ​గ్రామంలోని బొబ్బిలి ఫిషర్‌మెన్ సొసైటీ పరిధిలోకి వచ్చే హుస్సేన్‌ఖాన్ చెరువు, సిమ్మి నాయుడు చెరువు, వల్లభనాయుడు చెరువు అనే మూడు మత్స్య శాఖ చెరువులకు పూర్తిగా గండి పడింది. ఈ చెరువుల మొత్తం విస్తీర్ణం 67.22 హెక్టార్లు కాగా, అందులో నీటి వినియోగ విస్తీర్ణం 23.86 హెక్టార్లుగా ఉంది. ​చెరువులకు తీవ్రమైన గండి పడటంతో సుమారు 47,720 అడ్వాన్స్డ్ చేపపిల్లలు కొట్టుకుపోయాయని, దీనివల్ల రూ. 1,90,880 మేర నష్టం వాటిల్లిందని జిల్లా మత్స్య శాఖ అధికారి సంతోష్ అంచనా వేశారు.
​ఈ బొబ్బిలి ఫిషర్‌మెన్ సొసైటీలో మొత్తం 435 మంది సభ్యులు ఉండగా, గంగడ గ్రామంలో 11 మంది మత్స్యకారులు జీవనోపాధి పొందుతున్నారు. చెరువులకు గండి పడటంతో స్థానిక మత్స్యకారులు తీవ్ర ఆర్థిక ఇబ్బందుల్లో కూరుకుపోయారు. అధికారులు త్వరితగతిన స్పందించి నష్టపరిహారం అందించి ఆదుకోవాలని గ్రామానికి చెందిన మత్స్యకారులు కోరుతున్నారు.