గెలుపే లక్ష్యంగా మంత్రులకు సీఎం చంద్రబాబు దిశానిర్దేశం

అమరావతి, సూర్య ప్రధాన ప్రతినిధి :రాష్ట్రంలో స్థానిక సంస్థల ఎన్నికల నిర్వహణపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు మంత్రులతో నిర్వహించిన సమావేశంలో కీలక దిశానిర్దేశం చేశారు. నవంబర్ 15 నాటికి ఎన్నికల ప్రక్రియను పూర్తిగా ముగించి, ఆ తర్వాత పూర్తిస్థాయిలో రెగ్యులర్ పాలనపై దృష్టి పెట్టాలని ఆయన స్పష్టం చేశారు.

ఈ సమావేశంలో సీఎం చంద్రబాబు మాట్లాడుతూ... స్థానిక సంస్థల ఎన్నికల్లో కూటమి అభ్యర్థుల గెలుపు బాధ్యత పూర్తిగా జిల్లాల ఇన్‌ఛార్జ్ మంత్రులదేనని తేల్చిచెప్పారు. క్షేత్రస్థాయిలో కూటమి భాగస్వామ్య పార్టీల మధ్య సంపూర్ణ సమన్వయంతో పనిచేయాలని ఆదేశించారు. రాబోయే స్థానిక ఎన్నికల్లో ఎట్టి పరిస్థితుల్లోనూ 100 శాతం స్థానాలను కైవసం చేసుకునేలా అందరూ సమష్టిగా శ్రమించాలని పిలుపునిచ్చారు. ఎన్నికల సన్నాహాలు, అనుసరించాల్సిన వ్యూహాలపై మంత్రివర్గంలో విస్తృతంగా చర్చించారు.