ఎవరిది గెలుపు? మరి ఎవరిది ఓటమి?

పెదకాకాని న్యూస్: పొన్నూరు నియోజకవర్గం పెదకాకాని మండల  గురువారం జరిగిన స్థానిక ఎన్నికల పోలింగ్ లో అనూహ్యంగా పెరిగిన ఓటింగ్ సరళి దేనికి సంకేతమో? అంతుచిక్కని ప్రశ్నగా ఉంది. జడ్పిటిసి, ఎంపిటిసి ఎన్నికల పోలింగ్ లో పెద్ద ఎత్తున మహిళలు, యువత, వృద్ధులు సైతం పాల్గొని తమ ఓటు హక్కును వినియోగించుకున్నారు. పెరిగిన ఓట్ల శాతం ఎవరి ఖాతాలో జమ అయిందో తేలాల్సి ఉంది.  అధికార పక్షం రెండున్నర ఏళ్ల అభివృద్ధిని, సంక్షేమాన్ని ప్రధాన ఏజెండాగా తీసుకొని స్థానిక ఎన్నికల్లో ప్రజలకు వివరించడంలో సఫలీకృతులయ్యారు. కూటమి బలపరిచిన అభ్యర్థులను గెలిపిస్తే అభివృద్ధిని సంక్షేమాన్ని నిరాటకంగా కొనసాగిస్తామని ప్రజలకు వివరించారు. ప్రతిపక్షంలో ఉన్న పార్టీ తాము బలపరిచిన అభ్యర్థులను గెలిపిస్తే తిరిగి ప్రజలకు సంక్షేమాన్ని, అభివృద్ధిని రుచి చూపిస్తామని హామీలు ఇచ్చారు. ఈ నేపథ్యంలో ఓటరు ఎవరికి ప్రభావితం అయ్యారో తెలియదు. కానీ ఓటు హక్కు వినియోగించుకోవడానికి మాత్రం పోటెత్తారు.  బ్యాలెట్ బాక్స్ లో తమ అభిప్రాయాన్ని  పరోక్షంగా నిక్షిప్తం చేశారు.

పెదకాకాని మండలంలో మొత్తం ఓట్లు 65835, అందులో పోలైన ఓట్లు 48540. కొప్పురావూరు మొత్తం ఓట్లు 4126 అందులో పోలైనవి 3501, వెనిగండ్ల మొత్తం ఓట్లు 6989 పోలైనవి 5158, అగతవరప్పాడు మొత్తం ఓట్లు1998 అందులో పోలైనవి 1468, నంబూరు మొత్తం ఓట్లు 15097, అందులో పోలైనవి 11306, పెదకాకాని మొత్తం ఓట్లు 21547 అందులో పోలైనవి 14970,  గోళ్ళమూడి 508 అందులో పోలైనవి 418,. తక్కెళ్ళపాడు మొత్తం ఓట్లు 7047 అందులో పోలైనవి 4929. రామచంద్రాయపాలెం మొత్తం ఓట్లు 360 అందులో పోలైనవి 315. ఉప్పలపాడులో మొత్తం ఓట్లు 4831 అందులో పోలైనవి 3359. వెంకట కృష్ణాపురం మొత్తం ఓట్లు 1870 అందులో పోలైనవి 1549. తంగెళ్ళమూడి మొత్తం ఓట్లు 619 అందులో పోలైనవి 554. అనుమర్లపూడి మొత్తం ఓట్లు1223 అందులో పోలైనవి1008గా ఉన్నాయి.

తాము అధికారంలోకి వచ్చిన రెండున్నర సంవత్సరంలోని కూటమి ప్రభుత్వ హయాంలో అభివృద్ధిని పరుగు పెట్టించామని, అందుకే పుర ప్రజలు తమకు మద్దతు పలికారని, స్థానిక సంస్థల ఎన్నికల్లో కూడా కూటమి గెలుపు ఏకపక్షమేనని, ప్రజలు సంక్షేమానికి, అభివృద్ధికే పట్టం కట్టారని అధికారపక్షం ధీమా వ్యక్తం చేస్తుంది.

గత ప్రభుత్వ హయాంలో తాము నేరుగా లబ్ధిదారులకు అందించిన సంక్షేమ పథకాల ఫలాలే తమను స్థానిక సంస్థల్లో గెలిపిస్తాయని కాకాని ఓటర్లు చైతన్యవంతులని ఎవరికి పట్టం కట్టాలో వారి ఆలోచనలు వారికి ఉన్నాయని ప్రతిపక్షం పట్ల ప్రజలకు ఉన్న విశ్వసనీయత ఓట్ల రూపంలో కనబడిందని ప్రతిపక్షం ధీమా వ్యక్తం చేస్తుంది.