ఎన్నికల విధులకై... సర్వ సన్నద్ధమై..!!

ఒంగోలు, మేజర్‌న్యూస్‌ :

మునిసిపల్ ఎన్నికల నిర్వహణకు జిల్లా యంత్రాంగం అన్ని ఏర్పాట్లు పూర్తి చేసింది. పోలింగ్ నిర్వహణకు అవసరమైన సామగ్రితో డిస్ట్రిబ్యూషన్ కేంద్రం నుంచి సిబ్బంది తమ కేటాయించిన కేంద్రాలకు వెళ్లారు. ఈ మొత్తం ప్రక్రియలో ఎలాంటి లోపాలు లేకుండా అధికారులు చర్యలు తీసుకున్నారు. ఒంగోలు కార్పొరేషన్ కు సంబంధించి శనివారం రైజ్ ఇంజనీరింగ్ కాలేజీలో ఏర్పాటు చేసిన డిస్ట్రిబ్యూషన్ కేంద్రాన్ని కలెక్టర్ శ్రీ.పి.రాజాబాబు, ఎస్పీ శ్రీ.వి.హర్షవర్ధన్ రాజు, జిల్లా ఎన్నికల పరిశీలకులు శ్రీమతి కె.హెప్సిబా రాణి, వ్యయ పరిశీలకులు వివేక్ సందర్శించి ఈ మొత్తం ప్రక్రియను పర్యవేక్షించారు. ఎన్నికల విధులకు హాజరైన సిబ్బంది పోలింగ్ కేంద్రాల వారీగా తమకు కేటాయించిన సామగ్రిని తనిఖీ చేసుకున్నారు. భోజనం అనంతరం తమకు కేటాయించిన వాహనాలలో గట్టి భద్రత మధ్య పోలింగ్ కేంద్రాలకు బయలుదేరారు. విధుల నిర్వహణకు అవసరమైన సూచనలు చేసి అప్రమత్తంగా ఉండాలని కలెక్టర్ వారికి చెప్పారు. ఎన్నికల సంఘ నిబంధనల మేరకు సమర్థవంతంగా విధులు నిర్వహించాలని ఆయన స్పష్టం చేశారు. క్షేత్రస్థాయి పరిస్థితిని మైక్రో అబ్జర్వర్లు నిరంతరం నిశితంగా గమనిస్తూ ఎప్పటికప్పుడు తన దృష్టికి తీసుకురావాలని కలెక్టర్ చెప్పారు.