ఎన్నికల రద్దుతో ప్రజాస్వామ్యానికి ఊపిరి వైసీపీ మాజీ ఎమ్మెల్యే రఘురామిరెడ్డి

మైదుకూరు మేజర్ న్యూస్: మున్సిపల్‌ ఎన్నికల నామినేషన్ల ప్రక్రియను రద్దు చేసి తిరిగి ఎన్నికలు నిర్వహించేందుకు నిర్ణయించిన రాష్ట్ర ఎన్నికల సంఘాన్ని మాజీ ఎమ్మెల్యే శెట్టిపల్లె రఘురామిరెడ్డి అభినందించారు. సోమవారం మైదుకూరు వైఎస్సార్‌సీపీ కార్యాలయంలో నిర్వహించిన విలేకరుల సమావేశంలో ఆయన మాట్లాడారు.

మైదుకూరులో నామినేషన్ల సందర్భంగా అన్యాయాలు, అక్రమాలు చోటుచేసుకున్నాయని ఆరోపించారు. వైఎస్సార్‌సీపీ అభ్యర్థుల నామినేషన్‌ పత్రాలను చించివేసినా పోలీసులు అడ్డుకోలేదని విమర్శించారు. కొందరు అభ్యర్థులను బలవంతంగా బయటకు పంపించారని, మహిళా అభ్యర్థి పట్ల కూడా అనుచితంగా ప్రవర్తించారని అన్నారు.అధికారుల అండతో ఎన్నికలు జరిగితే ప్రజాస్వామ్యానికి అర్థం ఉండదని పేర్కొన్నారు. ప్రజల ఓటుతోనే నాయకులు గెలవాలని, అధికార యంత్రాంగం ద్వారా ఫలితాలను ప్రభావితం చేసే పరిస్థితి రాకూడదన్నారు.మైదుకూరుతో పాటు కడప, జమ్మలమడుగు, కమలాపురం, బద్వేల్లోనూ నామినేషన్ల సందర్భంగా అవకతవకలు జరిగాయని ఆరోపించారు. ఎన్నికల సంఘం నిర్ణయం ప్రజాస్వామ్య పరిరక్షణకు దోహదపడుతుందని, మళ్లీ జరిగే ఎన్నికల్లో ప్రజలు స్వేచ్ఛగా ఓటు హక్కును వినియోగించుకోవాలని రఘురామిరెడ్డి కోరారు.

రిపోర్టర్: బోర్రా శివరామిరెడ్డి, మైదుకూరు ఇంచార్జ్, కడప జిల్లా