ఎల్.కోట మండలంలో ఎమ్మెల్యే కోళ్ల విస్తృత ఎన్నికల ప్రచారం
ఎల్.కోట, సూర్య : ఎల్.కోట మండలంలో ఎన్నికల ప్రచారం జోరుగా సాగింది. స్థానిక ఎమ్మెల్యే కోళ్ల లలితకుమారి మండల పరిధిలోని పలు గ్రామాల్లో విస్తృతంగా పర్యటించి ఎన్నికల ప్రచారం నిర్వహించారు. తెలుగుదేశం పార్టీ బలపరిచిన జెడ్పీటీసీ అభ్యర్థి కరెడ్ల ఈశ్వరరావు, ఎంపీటీసీ అభ్యర్థి పుట్ట శ్రీనివాసరావు తరఫున ఆమె ప్రజలను కలిసి సైకిల్ గుర్తుపై ఓటు వేసి అభ్యర్థులను భారీ మెజారిటీతో గెలిపించాలని అభ్యర్థించారు. ప్రచారంలో భాగంగా ఆమెకు గ్రామస్తులు, పార్టీ కార్యకర్తలు ఘన స్వాగతం పలికారు.
ఈ సందర్భంగా నిర్వహించిన బహిరంగ సభలో ఎమ్మెల్యే కోళ్ల లలితకుమారి మాట్లాడుతూ, గ్రామాల అభివృద్ధి ఒక్క తెలుగుదేశం పార్టీతోనే సాధ్యమని పేర్కొన్నారు. గ్రామస్తులు తమ విలువైన రెండు ఓట్లను సైకిల్ గుర్తుకే వేయాలని కోరారు. ఒక ఓటు ఎంపీటీసీ అభ్యర్థి పుట్ట శ్రీనివాసరావుకు, మరొక ఓటు జెడ్పీటీసీ అభ్యర్థి కరెడ్ల ఈశ్వరరావుకు వేసి ఆశీర్వదించాలని విజ్ఞప్తి చేశారు. ఎల్.కోట గ్రామ ప్రజల ఆదరాభిమానాలు ఎల్లప్పుడూ తమపై ఉంటాయని, గ్రామానికి తమ కుటుంబం ఎప్పుడూ రుణపడి ఉండి సేవ చేస్తుందని ఆమె భావోద్వేగంగా పేర్కొన్నారు.
గ్రామంలో నెలకొన్న సమస్యలన్నింటినీ ప్రాధాన్యతా క్రమంలో పరిష్కరిస్తానని ఎమ్మెల్యే హామీ ఇచ్చారు. ముఖ్యంగా తాగునీటి సమస్య లేకుండా ప్రతి వీధిలో, ప్రతి ఇంటికీ కుళాయి కనెక్షన్లు ఏర్పాటు చేసే బాధ్యతను తాను స్వయంగా తీసుకుంటానని స్పష్టం చేశారు. అభ్యర్థుల గురించి ప్రస్తావిస్తూ—పుట్ట శ్రీనివాసరావు అందరికీ సుపరిచితుడైన వ్యక్తి అని, రంగరాయపురానికి చెందిన కరెడ్ల ఈశ్వరరావు మూడోసారి జడ్పీటీసీ అభ్యర్థిగా ప్రజల ముందుకు వచ్చారని గుర్తుచేశారు. ఎంపీటీసీగా శ్రీనివాసరావును గెలిపిస్తే తమ చెల్లెలు ఉషమ్మను ఎంపీపీగా బాధ్యతలు స్వీకరింపజేస్తామని, వీరందరి సహకారంతో మండలాన్ని, పంచాయతీని అన్ని రంగాల్లో ఆదర్శవంతంగా అభివృద్ధి చేస్తామని చెప్పారు. ప్రజలు తనపై ఉంచిన నమ్మకంతో సైకిల్ గుర్తుకు ఓట్లేసి అభ్యర్థులను ఆశీర్వదించాలని కోరారు.
