చెవిరెడ్డి మోహిత్ రెడ్డి న్యాయపోరాటానికి ఫలితం..! -ఆ ఆరు మండలాల్లో 5న జరిగే పోలింగ్‌పై హైకోర్టు కీలక ఆదేశాలు -సీసీ కెమెరాల నిఘాలోనే ఎన్నికలు.. ప్రతి క్షణం రికార్డింగ్‌ చేయాల్సిందే
తిరుపతి రూరల్, మేజర్ న్యూస్ :
చంద్రగిరి నియోజకవర్గ స్థానిక సంస్థల ఎన్నికల వేళ హైకోర్టు కీలక ఆదేశాలు జారీ చేసింది. ఈ నెల 5న ఆరు మండలాల పరిధిలో జరగనున్న ఎంపీటీసీ, జడ్పీటీసీ ఎన్నికల పోలింగ్‌ను సీసీ కెమెరాల పర్యవేక్షణలో నిర్వహించాలని ఆదేశించింది. ప్రతి పోలింగ్ కేంద్రంలోనూ పోలింగ్ ప్రక్రియ మొత్తాన్ని నిరంతరాయంగా వీడియో రికార్డింగ్‌ చేయాలని స్పష్టం చేసింది. కేంద్రాల లోపల, వెలుపల నమోదైన దృశ్యాలను భద్రపరిచి హైకోర్టుకు సమర్పించాలని సూచించింది.
నామినేషన్ల నుంచి న్యాయపోరాటం వరకు..
చంద్రగిరి నియోజకవర్గంలో నామినేషన్ల సమయంలో తమ పార్టీ అభ్యర్థులపై అక్రమాలు, దాడులు, దౌర్జన్యాలు జరిగాయని వైఎస్సార్సీపీ నేతలు ఆరోపించారు. ఈ వ్యవహారంపై చంద్రగిరి నియోజకవర్గ వైఎస్సార్సీపీ ఇన్ చార్జి చెవిరెడ్డి మోహిత్‌రెడ్డి ఆధారాలతో సహా న్యాయపోరాటం సాగించారు. పోలింగ్ ను ప్రశాంత వాతావరణంలో జరిపించాలని, రిగ్గింగ్ కు అవకాశం లేకుండా చూడాలని హైకోర్టును అభ్యర్థించారు. ఎన్నికల ప్రక్రియలో పారదర్శకత, స్వేచ్ఛాయుత వాతావరణం ఉండాలన్న అంశాన్ని న్యాయ స్థానం దృష్టికి తీసుకెళ్లారు. ఈ నేపథ్యంలో పోలింగ్ మొత్తాన్ని సీసీ కెమెరాల్లో రికార్డు చేయాలని హైకోర్టు ఆదేశించడం ప్రాధాన్యం సంతరించుకుంది.
ప్రతి కదలిక కెమెరా నిఘాలోనే..
పోలింగ్ కేంద్రాల లోపల, వెలుపల జరిగే పరిణామాలు వీడియోల్లో నమోదుకానుండటంతో ఎన్నికల నిర్వహణపై పర్యవేక్షణకు అవకాశం ఏర్పడింది. రికార్డింగ్‌ దృశ్యాలను భద్రపరచి న్యాయస్థానానికి సమర్పించాల్సి ఉండటంతో ఎన్నికల విధుల్లో ఉన్న యంత్రాంగంపై బాధ్యత మరింత పెరగనుంది.
ధైర్యంగా ఓటు హక్కు వినియోగించుకోండి
హైకోర్టు ఆదేశాల నేపథ్యంలో ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకోవాలని చెవిరెడ్డి మోహిత్‌రెడ్డి కోరారు. ప్రజాస్వామ్యంలో ఓటు అత్యంత విలువైనదని, ప్రతి ఒక్కరూ ధైర్యంగా పోలింగ్ కేంద్రాలకు వచ్చి ఓటు వేయాలని పిలుపునిచ్చారు.
Dwaraka, staff reporter
9705347341.
