బాలల దినోత్సవం సందర్భంగా మున్సిపల్ పాఠశాలలో న్యాయ విజ్ఞాన సదస్సు

​కావలి, మేజర్ న్యూస్ :    బాలల దినోత్సవాన్ని పురస్కరించుకుని కావలి పట్టణంలోని మున్సిపల్ పాఠశాలలో శనివారం న్యాయ విజ్ఞాన సదస్సు నిర్వహించారు. కావలి మండల న్యాయ సేవాధికార సంస్థ చైర్మన్ ఏ. గీతావాణి ఆదేశాల మేరకు ఈ కార్యక్రమం జరిగింది. ​సదస్సుకు ముఖ్య అతిథిగా హాజరైన అడిషనల్ జ్యుడీషియల్ ఫస్ట్ క్లాస్ మెజిస్ట్రేట్ జి. విక్రమ్ సిన్హా మాట్లాడుతూ, విద్యార్థులు పాఠశాల స్థాయి నుంచే క్రమశిక్షణ, వ్యక్తిగత పరిశుభ్రత పాటిస్తూ ఉన్నత చదువులకు పునాదులు వేసుకోవాలని సూచించారు. 12 ఏళ్ల లోపు పిల్లలందరూ తప్పనిసరిగా బడిలోనే ఉండాలని, విద్యా హక్కు చట్టంపై అవగాహన పెంచుకుని కష్టపడి చదువుకోవడం ద్వారా ఉన్నత శిఖరాలకు చేరుకుని తల్లిదండ్రులకు, ఉపాధ్యాయులకు పేరు తీసుకురావాలని ఆకాంక్షించారు. బడి బయట ఉన్న పిల్లలను కూడా పాఠశాలల్లో చేర్పించేలా కృషి చేయాలని పిలుపునిచ్చారు. ​ఈ కార్యక్రమంలో లీగల్ ఎయిడ్ సభ్యులు ఐ. సాయి ప్రసాద్, లోక్ అదాలత్ సభ్యులు ఎం. మాలకొండారెడ్డి, మహిళా న్యాయవాది వి. జయలక్ష్మి, మహిళా పోలీసులు, పాఠశాల ఉపాధ్యాయులు మరియు విద్యార్థులు పాల్గొన్నారు.