బాలల భవిష్యత్తుకు విద్యతోపాటు క్రీడలూ ముఖ్యం

మచిలీపట్నం, మేజర్ న్యూస్ : బాలల భవిష్యత్తుకు విద్యతోపాటు క్రీడలు, సాంస్కృతిక కార్యక్రమాలు ఎంతో ముఖ్యమని మచిలీపట్నం నగర మేయర్ అబ్దుల్ అబీదా అన్నారు. మచిలీపట్నంలోని నిర్మల హైస్కూల్‌లో బాలల దినోత్సవ వేడుకలను ఘనంగా, ఉత్సాహభరిత వాతావరణంలో నిర్వహించారు. ఈ కార్యక్రమానికి మేయర్ అబ్దుల్ అబీదా ముఖ్య అతిథిగా హాజరుకాగా,  16వ డివిజన్ టీడీపీ కార్పొరేటర్, రాష్ట్ర తెలుగు యువత ఉపాధ్యక్షుడు డాక్టర్ హసీం బేగ్, ప్రముఖ వైద్యురాలు డాక్టర్ తేజస్వి విశిష్ట అతిథులుగా పాల్గొన్నారు. ఈ సందర్భంగా పాఠశాల ప్రాంగణం విద్యార్థుల సందడి, ఆటపాటలతో కళకళలాడింది. బాలల దినోత్సవాన్ని పురస్కరించుకుని పాఠశాలలో నిర్వహించిన వివిధ క్రీడా పోటీలు, సాంస్కృతిక కార్యక్రమాల్లో విద్యార్థులు ఉత్సాహంగా పాల్గొని తమ ప్రతిభను చాటుకున్నారు. పోటీల్లో విజేతలుగా నిలిచిన విద్యార్థులకు ముఖ్య అతిథులు బహుమతులు, ప్రశంసాపత్రాలు అందజేసి అభినందించారు. ఈ సందర్భంగా మేయర్ అబ్దుల్ అబీదా మాట్లాడుతూ విద్యార్థుల జీవితంలో బాల్యం ఎంతో విలువైనదని, చదువుతోపాటు క్రీడలు, సాంస్కృతిక కార్యక్రమాల్లో పాల్గొనడం ద్వారా ఆత్మవిశ్వాసం, క్రమశిక్షణ, నాయకత్వ లక్షణాలు పెంపొందుతాయని పేర్కొన్నారు. ప్రతి విద్యార్థిలోనూ ఏదో ఒక ప్రత్యేక ప్రతిభ ఉంటుందని, దానిని గుర్తించి ప్రోత్సహించాల్సిన బాధ్యత తల్లిదండ్రులు, ఉపాధ్యాయులపై ఉందన్నారు. విద్యార్థులు ఉన్నత లక్ష్యాలను నిర్దేశించుకుని కష్టపడి చదివి భవిష్యత్తులో సమాజానికి ఉపయోగపడే పౌరులుగా ఎదగాలని ఆకాంక్షించారు. బాలల దినోత్సవ వేడుకల్లో భాగంగా ఉపాధ్యాయులు సైతం చిన్నారులతో కలిసి ఆటలు ఆడుతూ, పాటలు పాడుతూ సరదా కార్యక్రమాల్లో పాల్గొన్నారు. ఉపాధ్యాయుల ఉత్సాహభరిత ప్రదర్శనలకు విద్యార్థులు కేరింతలు కొడుతూ ఆనందోత్సాహాల్లో మునిగిపోయారు. కార్యక్రమంలో నిర్మల హైస్కూల్ కరస్పాండెంట్, ప్రిన్సిపాల్, ఉపాధ్యాయులు, ఇతర సిబ్బంది పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, మచిలీపట్నం, కృష్ణాజిల్లా.