అన్ని వర్గాల ప్రజల సంక్షేమానికి కూటమి ప్రాధాన్యత -- రాష్ట్ర మంత్రి కొలుసు పార్థసారథి
ఆగిరిపల్లి, మేజర్ న్యూస్ : ఆగిరిపల్లి మండలం నెక్కలంగొల్లగూడెం గ్రామంలో బుధవారం జీనస్ గాస్పల్ చర్చి పునఃప్రారంభోత్సవ కార్యక్రమంలో రాష్ట్ర గృహనిర్మాణ, సమాచార పౌరసంబంధాలు శాఖ మంత్రి కొలుసు పార్థసారథి ముఖ్య అతిథిగా పాల్గొన్నారు.చర్చికమిటీ సభ్యులు, పాస్టర్లు మంత్రి పార్థసారథిని ఘనస్వాగతం పలికారు.అనంతరం ఘనంగా సన్మానించి, ప్రత్యేక ప్రార్థనలు నిర్వహించి ఆశీర్వచనాలు అందించారు.
ఈ సందర్భంగా మంత్రి కొలుసు పార్థసారథి మాట్లాడుతూ చర్చి పునఃప్రారంభోత్సవంలో పాల్గొనుట చాలా సంతోషంగా ఉందన్నారు. సమాజంలో ప్రతి ఒక్కరూ శాంతి, ప్రేమ, సోదర భావంతో జీవించాలని క్రైస్తవ మతం బోధిస్తుందని పేర్కొన్నారు. దైవమార్గంలో నడుస్తూ తోటివారికి సహాయపడే గుణాన్ని అలవర్చుకోవాలని పిలుపు నిచ్చారు. గ్రామీణ ప్రాంతాల్లో ప్రజలందరూ ఐకమత్యంతో మెలిగి, గ్రామాభివృద్ధికి పాటుపడాలని ఆకాంక్షించారు. రాష్ట్ర ప్రభుత్వం అన్ని వర్గాలు ప్రజలు సంక్షేమానికి, సమానత్వానికి ప్రాధాన్యతను ఇస్తుందని, ప్రజాసంక్షేమమే కూటమి ప్రభుత్వం ధ్యేయంగా పనిచేస్తోందని తెలిపారు.
ఈ కార్యక్రమంలో చర్చి ఫాదరు దైవ ప్రసాదు, ప్రజాప్రతినిధులు, చర్చి ప్రతినిధులు, పాస్టర్లు, కూటమి నాయకులు, పాల్గొన్నారు.
