andhrapradesh
అనంతపురంలో వైభవంగా శ్రీరామ నవమి వేడుకలు: పాతూరు బ్రాహ్మణ వీధిలో 73వ ఉచిత శ్రీరామ కళ్యాణం
అనంతపురం బ్యూరో మేజర్ న్యూస్: గత ఏడు దశాబ్దాలకు పైగా ఎంతో నిష్టతో, భక్తిశ్రద్ధలతో నిర్వహిస్తున్న ఈ ఉచిత కళ్యాణ మహోత్సవానికి పాతూరు వీధులన్నీ రామానామ స్మరణతో మారుమోగాయి. ఉదయాన్నే మూలవిరాట్‌కు ప్రత్యేక అభిషేకాలు, పూజలు నిర్వహించిన అనంతరం, వేద పండితుల మంత్రోచ్ఛారణలు, మంగళవాయిద్యాల నడుమ సీతారాముల కళ్యాణాన్ని నేత్రపర్వంగా జరిపించారు.
ఈ వేడుకలో అనంతపురం నగరంతో పాటు చుట్టుపక్కల ప్రాంతాల నుంచి భక్తులు విరివిగా పాల్గొన్నారు. భక్తజనం పెద్ద ఎత్తున తరలివచ్చి స్వామివారి కళ్యాణాన్ని తిలకించి, ప్రత్యేక పూజలు నిర్వహించి తారకమంత్రం జపిస్తూ పునీతులయ్యారు. అనంతరం విచ్చేసిన భక్తులందరికీ నిర్వాహకులు తీర్థప్రసాదాలు, అన్నదానం ఏర్పాటు చేశారు. స్థానిక ప్రజలు, ఆధ్యాత్మిక వేత్తలు ఈ మహత్కార్యంలో పాలుపంచుకుని కార్యక్రమాన్ని విజయవంతం చేశారు.
