అంతర్జాతీయ వేదికపై టెక్కలి క్రీడాకారుల గిన్నిస్ వరల్డ్ రికార్డులో చోటు
- క్రీడాకారులు, కోచ్ను అభినందించిన మంత్రి కింజరాపు అచ్చెన్నాయుడు
కోటబొమ్మాళి, నవంబరు 16, మేజర్ న్యూస్:
అంతర్జాతీయ స్థాయిలో అరుదైన ఘనత సాధించి గిన్నిస్ బుక్ ఆఫ్ వరల్డ్ రికార్డ్స్లో స్థానం సంపాదించిన టెక్కలి టైక్వాండో క్రీడాకారులను రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు ప్రత్యేకంగా అభినందించారు. సోమవారం నిమ్మాడ క్యాంపు కార్యాలయంలో జరిగిన కార్యక్రమంలో గిన్నిస్ గుర్తింపు పొందిన టెక్కలి ఎన్టీఆర్ క్రీడా వికాస కేంద్రం బృందాన్ని ఆయన కలిశారు.
2026 ఆగస్టు 9న హైదరాబాద్లోని గచ్చిబౌలి స్టేడియంలో జరిగిన టైక్వాండో పోటీల్లో శిక్షకుడు నర్సిపురం శేఖర్ ఆధ్వర్యంలో క్రీడాకారులు మెండ తపస్వి (బ్లాక్ బెల్ట్), తమిరె జ్ఞానదీప్, అట్టాడ మహీధర్ నాయుడు అద్భుత ప్రతిభ కనబరిచి ప్రపంచ రికార్డు సృష్టించారు. వీరి ఘనతను అధికారికంగా ధ్రువీకరిస్తూ లండన్లోని గిన్నిస్ సంస్థ ధ్రువపత్రాలతో పాటు బంగారు పతకాలను పంపించింది. క్రీడాకారుల పట్టుదల, కోచ్ శేఖర్ శిక్షణ యావత్ దేశానికే గర్వకారణమని కొనియాడిన మంత్రి, భవిష్యత్తులోనూ వీరు మరిన్ని విజయాలు సాధించి రాష్ట్రానికి, దేశానికి మంచి పేరు తీసుకురావాలని ఆకాంక్షించారు.