ఆంధ్రప్రదేశ్ అకాడమీ ఆఫ్ సైన్సెస్ ఫెలోగా ఢిల్లీ టెక్నాలజికల్ యూనివర్సిటీ ప్రొఫెసర్ డా. ఎం. జయసింహాద్రి ఎన్నిక
వింజమూరు, మేజర్ న్యూస్ : వింజమూరు ప్రాంతానికి గర్వకారణం – శాస్త్ర పరిశోధనల్లో విశేష ప్రతిభకు గుర్తింపుగా ప్రతిష్ఠాత్మక ఫెలోషిప్
వింజమూరులోని రాజీవ్ నగర్లో నివసిస్తున్న దివంగత ఎం. కొండారెడ్డి (రిటైర్డ్ ఉపాధ్యాయుడు), రమణమ్మ దంపతుల కుమారుడు డా. ఎం. జయసింహాద్రి, ప్రతిష్ఠాత్మకమైన ఆంధ్రప్రదేశ్ అకాడమీ ఆఫ్ సైన్సెస్( ఏపీ ఏఎస్) అమరావతి ఫెలోగా 2026 సంవత్సరానికి ఎన్నికయ్యారు. డా. ఎం. జయసింహాద్రి, ఢిల్లీ టెక్నాలజికల్ యూనివర్సిటీ( డి టి యు)లో అప్లైడ్ ఫిజిక్స్ విభాగంలో ప్రొఫెసర్గా, పరిశోధన మరియు అభివృద్ధి విభాగం (రీసెర్చ్ అండ్ డెవలప్మెంట్) అసోసియేట్ డీన్గా బాధ్యతలు నిర్వహిస్తున్నారు. ఆయన 2026 సంవత్సరానికి గాను ప్రతిష్ఠాత్మకమైన ఆంధ్రప్రదేశ్ అకాడమీ ఆఫ్ సైన్సెస్ (ఏపీఎఎస్) అమరావతి ఫెలోగా ఎన్నికయ్యారు. శాస్త్ర పరిశోధన, ఉన్నత విద్య, విద్యా రంగ అభివృద్ధికి ఆయన చేసిన విశేష కృషికి ఈ గౌరవం దక్కింది. శాస్త్ర, పరిశోధనా రంగాల్లో విశేష ప్రతిభ కనబరిచిన వారికి అందించే ఈ ఫెలోషిప్ ఆయన పరిశోధనా విజయాలకు లభించిన గొప్ప గుర్తింపుగా నిలిచింది. 2026 నవంబర్ 22న జరిగిన ఆంధ్రప్రదేశ్ అకాడమీ ఆఫ్ సైన్సెస్ (ఏపీఎఎస్ )జనరల్ బాడీ సమావేశంలో, 2026 సంవత్సరానికి అకాడమీ ఫెలోగా ఎన్నికైన డా. ఎం. జయసింహాద్రిని అభినందించారు.
డా. జయసింహాద్రి 20 సంవత్సరాలకు పైగా పరిశోధన అనుభవం, 16 సంవత్సరాలకు పైగా బోధనా అనుభవం కలిగిన ప్రముఖ శాస్త్రవేత్త. ఆయన పరిశోధనా రంగాలు ముఖ్యంగా అధునాతన ఫంక్షనల్ మెటీరియల్స్, ల్యూమినిసెంట్ పదార్థాలు, ఫోటోనిక్ గ్లాసెస్, ఫాస్ఫర్స్, నానోఫాస్ఫర్స్ వంటి ఆధునిక శాస్త్ర సాంకేతిక అంశాలకు సంబంధించినవి.
ఆయన ఇప్పటివరకు అంతర్జాతీయ స్థాయిలో మొత్తం 165 పరిశోధనా వ్యాసాలను ప్రచురించారు. ఆయన పరిశోధనా వ్యాసాలకు ఇప్పటివరకు 7,600కు పైగా సైటేషన్లు లభించాయి. 51 హెచ్-ఇండెక్స్, విశేష పరిశోధనా ప్రతిభను చాటుకున్నారు. అంతర్జాతీయ స్థాయిలో ప్రతిష్ఠాత్మకమైన స్టాన్ఫోర్డ్ విశ్వవిద్యాలయం రూపొందించే ప్రపంచంలోని అత్యుత్తమ 2 శాతం శాస్త్రవేత్తల జాబితాలో 2020 నుంచి 2025 వరకు వరుసగా చోటు దక్కించుకున్నారు. భారత ప్రభుత్వానికి చెందిన సైన్స్ అండ్ ఇంజినీరింగ్ రీసెర్చ్ బోర్డు (ఎస్ సి ఆర్ బి డి ఎస్ టి)నుంచి ఫిజికల్ సైన్సెస్ విభాగంలో యంగ్ సైంటిస్ట్ అవార్డు అందుకున్నారు.
పరిశోధనా రంగంలో ఆయన సాధించిన విజయాలకు జాతీయ, అంతర్జాతీయ స్థాయిలో అనేక పురస్కారాలు, గౌరవాలు లభించాయి. యువ పరిశోధకులను తీర్చిదిద్దడంలోనూ ఆయన విశేష కృషి చేస్తున్నారు. ఇప్పటివరకు 10 మంది పీహెచ్డీ పరిశోధకులకు విజయవంతంగా మార్గదర్శకత్వం వహించారు. ప్రస్తుతం మరో ఎనిమిది మంది పీహెచ్డీ పరిశోధకులు ఆయన పర్యవేక్షణలో పరిశోధనలు కొనసాగిస్తున్నారు. అదనంగా, ఒక ఏఐసిటిఈపోస్ట్డాక్టోరల్ ఫెలోషిప్ పరిశోధకుడికి కూడా మార్గదర్శకత్వం వహిస్తున్నారు.
విద్యా, పరిశోధనా రంగాలతో పాటు విశ్వవిద్యాలయ పరిపాలనలోనూ ఆయన కీలక బాధ్యతలు నిర్వహిస్తున్నారు. ప్రస్తుతం ఢిల్లీ టెక్నాలజికల్ యూనివర్సిటీలో పరిశోధన మరియు అభివృద్ధి విభాగం అసోసియేట్ డీన్గా, సెంటర్ ఆఫ్ ఎక్సలెన్స్ ఫర్ సైన్స్ ఆఫ్ హ్యాపీనెస్ (CESH) అసోసియేట్ హెడ్గా సేవలందిస్తున్నారు. విశ్వవిద్యాలయంలో పరిశోధనా కార్యకలాపాలను బలోపేతం చేయడం, నూతన ఆవిష్కరణలను ప్రోత్సహించడం, పరిశోధనా కార్యక్రమాలను విస్తరించడం, వివిధ శాస్త్ర విభాగాల మధ్య సమన్వయంతో పరిశోధనలను ప్రోత్సహించడంలో ఆయన విశేషంగా కృషి చేస్తున్నారు.
ముఖ్యంగా, శ్రీ వేంకటేశ్వర విశ్వవిద్యాలయం (ఎస్ వి యు)తిరుపతిలో భౌతిక శాస్త్రంలో పీహెచ్డీ పట్టా పొందిన డా. జయసింహాద్రి, తన విద్యా ప్రస్థానాన్ని పరిశోధనా రంగంలో ఉన్నత శిఖరాలకు తీసుకెళ్లడం విశేషం. ఆయన సాధించిన ఈ గుర్తింపు విద్యార్థులకు, ప్రస్తుత పరిశోధకులకు, ముఖ్యంగా భౌతిక శాస్త్రం మరియు ఇతర శాస్త్ర సాంకేతిక రంగాల్లో ఉన్నత విద్యను అభ్యసిస్తున్న విద్యార్థులకు ఎంతో స్ఫూర్తిదాయకం. అలాగే వింజమూరు ప్రాంతానికి చెందిన విద్యార్థులు, యువతకు ఆయన ప్రస్థానం ఒక ఆదర్శంగా నిలుస్తుంది. గ్రామీణ ప్రాంతాల నుంచి వచ్చిన విద్యార్థులు కూడా పట్టుదల, నిరంతర కృషి, పరిశోధన పట్ల నిబద్ధతతో జాతీయ, అంతర్జాతీయ స్థాయిలో ఉన్నత స్థానాలను చేరుకోగలరని ఆయన విజయ ప్రస్థానం చాటిచెబుతోంది.
ఆంధ్రప్రదేశ్ అకాడమీ ఆఫ్ సైన్సెస్ ఫెలోగా ఎన్నిక కావడం తన విద్యా, పరిశోధనా జీవితంలో ఒక ముఖ్యమైన మైలురాయిగా ఆయన పేర్కొన్నారు. ఈ సందర్భంగా తనకు మార్గదర్శకత్వం వహించిన గురువులు, సహచర అధ్యాపకులు, పరిశోధనా సహకారులు, విద్యార్థులు, కుటుంబ సభ్యులు, ఢిల్లీ టెక్నాలజికల్ యూనివర్సిటీకి హృదయపూర్వక కృతజ్ఞతలు తెలిపారు. ఈ గౌరవం భవిష్యత్తులో మరింత నాణ్యమైన శాస్త్ర పరిశోధనలు చేపట్టడానికి, నూతన ఆవిష్కరణలకు, ఉన్నత విద్యాభివృద్ధికి మరింత ప్రేరణనిస్తుందని ఆయన పేర్కొన్నారు.
వింజమూరు ప్రాంతం నుంచి ప్రారంభమైన విద్యా ప్రస్థానం, శ్రీ వేంకటేశ్వర విశ్వవిద్యాలయంలో ఉన్నత పరిశోధనా విద్య, నేడు ఢిల్లీ టెక్నాలజికల్ యూనివర్సిటీలో ప్రొఫెసర్ స్థాయి నుంచి ఆంధ్రప్రదేశ్ అకాడమీ ఆఫ్ సైన్సెస్ ఫెలో వరకు సాగడం యువతకు స్ఫూర్తిదాయకం. ఆయన సాధించిన ఈ గౌరవం వింజమూరు ప్రాంతానికి విశేష గౌరవాన్ని తీసుకొచ్చింది.