అగ్నికుల క్షత్రియ నేత కొల్లు మూర్తి మృతి బాధాకరం... వైసీపీ నేత కొల్లు త్రినాధ వర్మ....

అమలాపురం మేజర్ న్యూస్ :అగ్నికుల క్షత్రియ నేత, మత్స్యకార నాయకుడు కొల్లు సత్యనారాయణ మూర్తి అలియాస్ బాబ్జి మృతి ఎంతో బాధాకరమని వైఎస్సార్ కాంగ్రెస్ పార్టీ రాష్ట్ర ఆర్టీఐ జోన్-2 అధ్యక్షుడు కొల్లు త్రినాధ వర్మ అన్నారు. అంబేద్కర్ కోనసీమ జిల్లా ,అల్లవరం మండలం ఓడలరేవు గ్రామంలో బాబ్జి భౌతికకాయానికి పూలమాలలు వేసి నివాళులర్పించారు. కుటుంబ సభ్యులను పరామర్శించి ప్రగాఢ సానుభూతి తెలియజేశారు.
1942లో జన్మించిన కొల్లు సత్యనారాయణ మూర్తి ఓడలరేవు గ్రామంలో రాజకీయంగా, సామాజికంగా ప్రత్యేక గుర్తింపు సంపాదించుకున్నారు. ఆర్థికంగా సంపన్నుడైన ఆయన సుమారు 50 ఎకరాల వ్యవసాయ భూమిని కలిగి ఉండటంతో పాటు, రెండు దశాబ్దాల పాటు గ్రామ సర్పంచ్‌గా పనిచేసి ప్రజలకు సేవలందించారు. నాలుగు దశాబ్దాల రాజకీయ జీవితంలో సర్పంచ్‌గా, మార్కెట్ యార్డు వైస్ చైర్మన్‌గా పలు పదవులు చేపట్టి తనదైన ముద్ర వేశారు.
ఈ సందర్భంగా కొల్లు త్రినాధ వర్మ మాట్లాడుతూ, రాజకీయాల్లో పదవులు చేపట్టి ఆస్తులు సంపాదించుకునే వారు ఉంటారని, అయితే తనకున్న ఆస్తులను మత్స్యకారుల సంక్షేమం కోసం వినియోగించిన గొప్ప నాయకుడు బాబ్జి అని కొనియాడారు. అగ్నికుల క్షత్రియులు, మత్స్యకారుల అభ్యున్నతికి ఆయన చేసిన సేవలు చిరస్మరణీయమని పేర్కొన్నారు. అమలాపురం తాలూకా అగ్నికుల క్షత్రియుల సంఘ భవనం కోసం సుమారు రూ.20 కోట్ల విలువైన స్థలాన్ని సమకూర్చేందుకు ఆయన కృషి చేశారని తెలిపారు.
సర్పంచ్‌గా, మార్కెట్ యార్డు వైస్ చైర్మన్‌గా వివిధ బాధ్యతలు నిర్వహిస్తూ అగ్నికుల క్షత్రియులకు అండగా నిలిచిన బాబ్జి మృతి ఆ వర్గానికి తీరని లోటని పలువురు మత్స్యకార నాయకులు పేర్కొన్నారు. ఆయన సేవలను స్మరించుకుంటూ నివాళులర్పించారు.
ఈ కార్యక్రమంలో మాజీ సర్పంచ్ మల్లాడి ఉమామహేశ్వర వర్మ, మల్లాడి భాను, కోపనాతి ప్రసాద్, ఐనగడ్డ శేషయ్య, వైఎస్సార్‌సీపీ ఓడలరేవు గ్రామ కమిటీ అధ్యక్షుడు త్రిమూర్తులు విశ్వనాథం, పల్లి కామేశ్వరరావు, కొప్పాడి రామకృష్ణ, కోలా బాబులు, కొల్లు వేణుగోపాల్, బొమ్మిడి బాబురావు, కొప్పాడి నాగేశ్వరరావు, మల్లాడి నాగేశ్వరరావు, పెమ్మాడి సాయిబాబు, మాజీ తాలూకా కమిటీ అధ్యక్షుడు సాయి, గ్రామ పెద్దలు తదితరులు పాల్గొన్నారు.