ఆతిథ్య నిర్వహణలో భేష్..

- జేసీ ఫర్మాన్ అహ్మద్ ఖాన్‌కు సీఎం పురస్కారం!

* సీఐఐ సదస్సులో వేలాది మంది అతిథులకు లోటుపాట్లు లేని విందు ఏర్పాట్లు

* ఆంధ్రా రుచులకు ఫిదా అయిన విదేశీ దౌత్యవేత్తల ప్రశంసల జల్లు

* ప్రతిభను గుర్తించి అవార్డుతో సత్కరించిన ముఖ్యమంత్రి చంద్రబాబు నాయుడు

శ్రీకాకుళం నవంబర్ 14 మేజర్ న్యూస్:
ప్రతిష్టాత్మక సీఐఐ భాగస్వామ్య సదస్సుకు తరలివచ్చిన వేలాది మంది జాతీయ, అంతర్జాతీయ అతిథులకు ఆతిథ్యం అందించడంలో అత్యుత్తమ ప్రతిభ కనబరిచిన శ్రీకాకుళం జిల్లా జాయింట్ కలెక్టర్ ఫర్మాన్ అహ్మద్ ఖాన్ ను ముఖ్యమంత్రి నారా చంద్రబాబు నాయుడు ప్రత్యేకంగా అభినందించి, అవార్డుతో సత్కరించారు.
సదస్సు ప్రాంగణంలో వివిధ దేశాల నుంచి విచ్చేసిన దౌత్యవేత్తలు, పారిశ్రామికవేత్తలు, ప్రతినిధులకు భోజనాల విషయంలో ఎక్కడా ఏ చిన్న అసౌకర్యం తలెత్తకుండా, ఒక్క విమర్శకూ తావులేకుండా ఆయన పకడ్బందీ ఏర్పాట్లు చేశారు. మన సంప్రదాయ ఆంధ్రా వంటకాలను ఎంతో రుచికరంగా, నాణ్యతతో అందించడంతో చాలామంది విదేశీ దౌత్యవేత్తలు, అతిథులు విందు అద్భుతంగా ఉందంటూ ప్రశంసలు కురిపించారు. మన ఆతిథ్య వైభవాన్ని ప్రపంచ దేశాల ప్రతినిధులకు పరిచయం చేయడంలో ఆయన కీలక పాత్ర పోషించారు.
సమయస్ఫూర్తితో, సమర్థవంతమైన ప్రణాళికతో విందు ఏర్పాట్లను పర్యవేక్షించిన జేసీ ఫర్మాన్ అహ్మద్ ఖాన్ సేవలను గుర్తించిన ప్రభుత్వం ఆయనకు ఈ పురస్కారాన్ని అందించింది. జాతీయ స్థాయి సదస్సులో శ్రీకాకుళం జిల్లా అధికార యంత్రాంగం కీర్తిని ఇనుమడింపజేస్తూ సీఎం చేతులమీదుగా అవార్డు అందుకున్న జాయింట్ కలెక్టర్‌కు సహచర అధికారులు, సిబ్బంది అభినందనలు తెలిపారు.