ఆర్‌అండ్‌ఆర్‌ కాలనీలో అభివృద్ధి పనులు వేగవంతం చేయాలి: కొప్పిశెట్టి
త్వరలో హోంమంత్రి వంగలపూడి అనిత చేతుల మీదుగా ప్రారంభోత్సవం
నక్కపల్లి,ఆర్‌అండ్‌ఆర్‌ కాలనీలో చేపడుతున్న అభివృద్ధి పనులను నాణ్యతా ప్రమాణాలతో త్వరితగతిన పూర్తి చేయాలని పాయకరావుపేట నియోజకవర్గ టీడీపీ కన్వీనర్‌ కొప్పిశెట్టి వెంకటేష్‌ అధికారులకు సూచించారు. కాలనీలో నిర్మాణంలో ఉన్న పార్కు, వాకింగ్‌ ట్రాక్‌, పాఠశాల, కమ్యూనిటీ హాల్‌, హెల్త్‌ సెంటర్‌, స్మశానవాటిక, ప్రహరీ గోడ, షాపింగ్‌ కాంప్లెక్స్‌ పనులను ఆయన పరిశీలించి పురోగతిని సమీక్షించారు. నిర్మాణాల్లో నాణ్యత విషయంలో రాజీ పడకుండా, నిర్ణీత గడువులోగా పూర్తి చేయాలని ఆదేశించారు. ప్రజాధనం సద్వినియోగమయ్యేలా అధికారులు ప్రత్యేక శ్రద్ధ వహించాలన్నారు. పనులు పూర్తయిన అనంతరం త్వరలో రాష్ట్ర హోంమంత్రి శ్రీమతి వంగలపూడి అనిత చేతుల మీదుగా ప్రారంభించేందుకు చర్యలు తీసుకుంటున్నట్లు తెలిపారు. అభివృద్ధి పనులు అందుబాటులోకి వస్తే కాలనీవాసులకు మెరుగైన మౌలిక సదుపాయాలు సమకూరుతాయని పేర్కొన్నారు.
