జాతీయ రహదారిపై బ్లాక్ స్పాట్ల పరిశీలన..

- ప్రమాదాల నివారణకు పోలీసు, హైవే అధికారుల సంయుక్త తనిఖీలు..

నరసన్నపేట అక్టోబర్ 10 మేజర్ న్యూస్: జాతీయ రహదారిపై రోడ్డు ప్రమాదాల నివారణ, వాహనదారుల భద్రతే లక్ష్యంగా పోలీసు, హైవే అధికారులు సంయుక్తంగా క్షేత్రస్థాయి పరిశీలన చేపట్టారు. శనివారం సాయంత్రం మడపాం బ్రిడ్జి నుంచి జడూరు జంక్షన్ వరకు జాతీయ రహదారిపై ఉన్న ప్రమాదకర ప్రాంతాలు (బ్లాక్ స్పాట్స్), రహదారి భద్రతా ఏర్పాట్లు, వీధి దీపాలు, సీసీ కెమెరాల పనితీరును తనిఖీ చేశారు.నరసన్నపేట సీఐ ఎం. శ్రీనివాసరావు, ఎస్ఐ బి. గణేశ్, హైవే అథారిటీ అధికారులు ఈ పరిశీలనలో పాల్గొన్నారు. ప్రమాదాలు ఎక్కువగా జరిగే ప్రాంతాలను గుర్తించడంతో పాటు, రాత్రి వేళల్లో వాహనదారులకు తగిన వెలుతురు అందుబాటులో ఉందా లేదా, సీసీ కెమెరాలు సక్రమంగా పనిచేస్తున్నాయా లేదా అనే అంశాలను పరిశీలించారు.రహదారిపై ప్రమాదాల నివారణకు అవసరమైన భద్రతా చర్యలు, గుర్తించిన లోపాల సవరణపై సమీక్షించారు. సంబంధిత శాఖల అధికారులు సమన్వయంతో పనిచేస్తూ అవసరమైన చర్యలు చేపట్టాలని నిర్ణయించారు.వాహనదారుల భద్రతను మెరుగుపరచడం, ప్రమాదాలను తగ్గించడం, ప్రజల ప్రాణాలను కాపాడటమే ఈ తనిఖీల ప్రధాన ఉద్దేశమని అధికారులు తెలిపారు.