1,380 మంది బైండోవర్‌

బాపట్ల, మేజర్ న్యూస్:

స్థానిక సంస్థల ఎన్నికల నేపథ్యంలో జిల్లావ్యాప్తంగా 1,380 మందిని ముందస్తుగా బైండోవర్‌ చేసినట్లు ఎస్పీ బి. ఉమా మహేశ్వర్‌ తెలిపారు. శనివారం ఎస్పీ క్యాంపు కార్యాలయంలో నిర్వహించిన విలేకరుల సమావేశంలో ఆయన మాట్లాడుతూ.. బాపట్ల సబ్‌ డివిజన్‌లో 419 మంది, చీరాలలో 509 మంది, రేపల్లెలో 452 మందిపై ముందస్తు చర్యలు తీసుకున్నట్లు వెల్లడించారు. జిల్లాలోని 300 ఎంపీటీసీ స్థానాలకు 1,549 మంది, 20 జెడ్పీటీసీ స్థానాలకు 138 మంది నామినేషన్లు దాఖలు చేశారన్నారు. ఎన్నికల కోడ్‌ అమల్లో ఉన్నందున 17 చెక్‌పోస్టులు ఏర్పాటు చేసి వాహన తనిఖీలు చేపడుతున్నట్లు తెలిపారు. రూ.50 వేలకుపైగా నగదు తీసుకెళ్లేవారు ఆధారాలు వెంట ఉంచుకోవాలని, ర్యాలీలు, సభలు, మైకుల వినియోగానికి ముందస్తు అనుమతులు తీసుకోవాలని సూచించారు. ఎన్నికలు ప్రశాంతంగా జరిగేందుకు ప్రజలు సహకరించాలని కోరారు.