మనవరాలి ప్రాణాల కోసం ప్రాణత్యాగం.. బైతరణి నదిలో అవ్వ,తాతలు జలసమాధి

పెద్దపంజాణి, మేజర్ న్యూస్:
చిత్తూరు జిల్లా గంగవరం మండలం మేలుమాయి క్రాసులో తీవ్ర విషాద ఛాయలు అలుముకున్నాయి. అల్లారుముద్దుగా పెంచుకున్న మనవరాలి ప్రాణాలను కాపాడే ప్రయత్నంలో అవ్వ, తాత ఇద్దరూ మృత్యుఒడికి చేరుకున్నారు. ఒడిశా రాష్ట్రం భువనేశ్వర్ సమీపంలోని బైతరణి నదిలో జరిగిన ఈ హృదయవిదారక ఘటన స్థానికంగా తీవ్ర కలకలం రేపింది. గంగవరం మండలం మేలుమాయి క్రాసు లో రైస్ మిల్లు నిర్వహించే శ్రీనివాసులు దంపతులు తమ కుటుంబ సభ్యులతో కలిసి ఒడిశా పర్యటనకు వెళ్లారు. భువనేశ్వర్ సమీపంలో ప్రవహిస్తున్న బైతరణి నది వద్దకు వెళ్లిన సమయంలో ప్రమాదవశాత్తు నీటిలో జారిపడిన మనవరాలును చూసి అవ్వ,తాతల గుండె తల్లడిల్లిపోయింది. తమ ప్రాణాలను సైతం లెక్కచేయకుండా, చిన్నారిని కాపాడేందుకు అవ్వ తాత ఇద్దరూ నదిలోకి దూకారు. దీంతో వారు నదీ గల్లంతయ్యారు. కళ్లముందే జరిగిన ఈ ఘోరంతో కుటుంబ సభ్యులు కన్నీరు మున్నీరుగా విలపించారు.అందరితో ఎంతో ఆప్యాయంగా ఉండే ఆ దంపతులు ఇలా అకాల మరణం చెందడంతో మేలుమాయి క్రాసులో విషాద వాతావరణం నెలకొంది. మనవరాలిపై ఉన్న అపారమైన ప్రేమతో తమ ప్రాణాలనే ఫణంగా పెట్టిన ఆ వృద్ధ దంపతుల త్యాగాన్ని తలచుకుని గ్రామస్థులందరూ కంటతడి పెడుతున్నారు.

ఎం సుబ్రహ్మణ్యం రెడ్డి రిపోర్టర్ పెద్దపంజాణి