మార్కాపురం జిల్లాలో నగర పంచాయతీ, గ్రామ పంచాయతీ ఎన్నికలకు సమాయత్తం

మార్కాపురం, మేజర్‌న్యూస్‌:
రాష్ట్రంలో పట్టణ స్థానిక సంస్థలు, గ్రామ పంచాయతీ ఎన్నికల నిర్వహణకు అవసరమైన ఏర్పాట్లపై రాష్ట్ర ఎన్నికల కమిషనర్ అనిల్ చంద్ర పునేఠా అన్ని జిల్లాల కలెక్టర్లు, ఎస్పీలతో గురువారం సమీక్ష సమావేశం నిర్వహించారు. ఈ సందర్భంగా ఎన్నికల నిర్వహణకు సంబంధించి జిల్లా వారీగా సన్నద్ధత, పరిపాలనా ఏర్పాట్లు, శాంతిభద్రతల పరిరక్షణ తదితర అంశాలపై అధికారులకు దిశానిర్దేశం చేశారు. ఎన్నికల ప్రక్రియ స్వేచ్ఛాయుతంగా, నిష్పక్షపాతంగా, ప్రశాంత వాతావరణంలో జరిగేలా సమన్వయంతో పనిచేయాలని సూచించారు.

పొదిలి నగర పంచాయతీకి ఎన్నికలు : 
రాష్ట్ర వ్యాప్తంగా 23 పట్టణ స్థానిక సంస్థల నిర్వహణకు ఆంధ్రప్రదేశ్ రాష్ట్ర ఎన్నికల సంఘం అధికారిక నోటిఫికేషన్ విడుదల చేసింది. మార్కాపురం జిల్లాలోని పొదిలి నగర పంచాయతీకి కూడా ఎన్నికలు జరగనున్నాయి. నవంబర్ 14 నుంచి 16వ తేదీ వరకు నామినేషన్లు స్వీకరించనుండగా.. నవంబర్ 17న నామినేషన్ల పరిశీలన జరగనుంది. నవంబర్ 19వ తేదీ అభ్యర్థులు తమ నామినేషన్లు ఉపసంహరించుకోవచ్చు. నవంబర్ 26న పోలింగ్ జరగనుండగా.. నవంబర్ 30వ తేదీ ఓట్ల లెక్కింపు చేపట్టి ఫలితాలను ప్రకటిస్తారు.

మూడు దశల్లో పంచాయతీ ఎన్నికలు :
రాష్ట్ర వ్యాప్తంగా మూడు దశల్లో పంచాయతీ ఎన్నికలు నిర్వహించనున్నట్లు రాష్ట్ర ఎన్నికల కమిషనర్ అనిల్ చంద్ర పునేఠా వెల్లడించారు. నవంబర్ 13న మొదటి దశ, నవంబర్ 16న రెండో దశ, నవంబర్ 19న మూడో దశ పంచాయతీ ఎన్నికల నోటిఫికేషన్ విడుదల కానుంది. మొదటి దశ పంచాయతీలకు నవంబర్ 26వ తేదీన ఎన్నికలు జరగనుండగా.. రెండో దశ పంచాయతీలకు నవంబర్ 29న ఎన్నికలు జరగనున్నాయి. చివరి దశ పంచాయతీ ఎన్నికలు డిసెంబర్ 2వ తేదీ జరగనున్నట్లు రాష్ట్ర ఎన్నికల కమిషన్ వెల్లడించింది. ఈ పంచాయతీ ఎన్నికలకు సంబంధించి రెండు, మూడు పంచాయతీలను ఒక క్లస్టర్‌గా తీసుకుని నామినేషన్లు స్వీకరించనున్నట్లు అధికారులు పేర్కొన్నారు.