రైతు ఉత్పత్తిదారుల సంఘానికి నూతన భవన నిర్మాణానికి అడుగులు!

30 సెంట్ల స్థలం పరిశీలన
బాడంగి, నవంబరు 12 (మేజర్ న్యూస్): మండలంలోని రైతు ఉత్పత్తిదారుల సంఘం (ఎఫ్‌పీఓ)కు నూతన భవన నిర్మాణం చేపట్టేందుకు అధికారులు గురువారం స్థల పరిశీలన నిర్వహించారు. వెలుగు ఏపీఎం ఏ. రత్నకుమార్‌ తన సిబ్బందితో కలిసి బాడంగి ఐసీడీఎస్‌ ప్రాజెక్టు కార్యాలయం సమీపంలో ప్రభుత్వం కేటాయించిన 30 సెంట్ల స్థలాన్ని పరిశీలించారు. ఈ సందర్భంగా ఏపీఎం మాట్లాడుతూ రైతు ఉత్పత్తిదారుల సంఘం నూతన భవనం అందుబాటులోకి వస్తే రైతులకు అనేక విధాలుగా ప్రయోజనం చేకూరుతుందని తెలిపారు.
భవన నిర్మాణం పూర్తయితే రైతులకు అవసరమైన వ్యవసాయ పనిముట్లను ప్రభుత్వం కల్పించే రాయితీలతో సరసమైన ధరలకు అందించేందుకు వీలుంటుందని పేర్కొన్నారు. అంతేకాకుండా సంఘంలోని రైతులందరూ ఒకే వేదికపై సమావేశమై వ్యవసాయ సంబంధిత సమస్యలు, సాగు పద్ధతులు, ప్రభుత్వ పథకాలు, ఇతర అవసరాలపై చర్చించుకోవడానికి అవకాశం కలుగుతుందని వివరించారు. రైతుల సంఘటిత అభివృద్ధికి, పరస్పర సహకారానికి నూతన భవనం ఎంతగానో దోహదపడుతుందని ఆశాభావం వ్యక్తం చేశారు