యువతకు స్వయం ఉపాధి కల్పనపై మంత్రి శ్రీధర్ బాబుకు పానుగంటి విజయ్ గౌడ్ వినతి పత్రం

యువతకు స్వయం ఉపాధి కల్పనపై మంత్రి శ్రీధర్ బాబుకు పానుగంటి విజయ్ గౌడ్ వినతి పత్రం

మునుగోడు,మేజర్ న్యూస్:బీసీల విద్య, ఉద్యోగ, ఆర్థిక, సామాజిక అభివృద్ధికి ప్రభుత్వం మరిన్ని అవకాశాలు కల్పించాలని కోరుతూ బీసీ యువజన సంఘం రాష్ట్ర ఉపాధ్యక్షుడు పానుగంటి విజయ్ గౌడ్ మంత్రి శ్రీధర్ బాబునీ కోరారు. శుక్రవారం హైదరాబాద్‌లోని మంత్రుల నివాసంలో తెలంగాణ రాష్ట్ర ఐటీ, ఎలక్ట్రానిక్స్ అండ్ కమ్యూనికేషన్స్, పరిశ్రమలు మరియు వాణిజ్య, శాసన వ్యవహారాల శాఖల మంత్రి దుద్దిళ్ల శ్రీధర్ బాబును మర్యాదపూర్వకంగా కలిసి వినతిపత్రం అందజేశారు.
ఈ సందర్భంగా బీసీ యువతకు నైపుణ్యాభివృద్ధి శిక్షణ కార్యక్రమాలు విస్తృతం చేయడంతో పాటు స్వయం ఉపాధి అవకాశాలు కల్పించి ఆర్థికంగా ఎదిగేందుకు ప్రభుత్వం ప్రోత్సాహం అందించాలని కోరారు. విద్య, ఉద్యోగ రంగాల్లో బీసీలకు మరిన్ని అవకాశాలు కల్పించి సామాజికంగా, ఆర్థికంగా అభివృద్ధి చెందేందుకు ప్రత్యేక చర్యలు తీసుకోవాలని విజ్ఞప్తి చేశారు.ముఖ్యంగా చౌటుప్పల్ ప్రాంతంలోని వివిధ పరిశ్రమలు, కంపెనీల్లో స్థానిక నిరుద్యోగ యువతకు ఉద్యోగ అవకాశాలు కల్పించడంలో ప్రాధాన్యత ఇవ్వాలని మంత్రి దృష్టికి తీసుకెళ్లారు. స్థానిక యువతకు ఉపాధి లభిస్తే వారి కుటుంబాల ఆర్థిక పరిస్థితులు మెరుగుపడటంతో పాటు ప్రాంతీయ అభివృద్ధికి కూడా దోహదపడుతుందని పేర్కొన్నారు. బీసీ యువత భవిష్యత్తును దృష్టిలో ఉంచుకొని ఉపాధి అవకాశాల కల్పనకు తగిన చర్యలు తీసుకోవాలనీ కోరారు.

కె. ఇంద్రసేనారెడ్డి, మేజర్ న్యూస్, మునుగోడు, నల్గొండ