telangana
రైల్వే గేటు పడితే ట్రాఫిక్ కష్టాలే.. కిలోమీటర్ల మేర నిలిచిపోతున్న వాహనాలు
మేడ్చల్, మేజర్ న్యూస్: గుండ్లపోచంపల్లి నుంచి అయోధ్య వైపు వెళ్లే ప్రధాన రహదారిపై ట్రాఫిక్ సమస్య వాహనదారులకు తీవ్ర ఇబ్బందులు కలిగిస్తోంది. ఈ మార్గంలోని రైల్వే గేటు వద్ద రైళ్ల రాకపోకల సమయంలో గేటు మూసివేయడంతో ఇరువైపులా వాహనాలు భారీగా నిలిచిపోతున్నాయి. గేటు తెరుచుకునే వరకు వాహనదారులు గంటల తరబడి వేచి ఉండాల్సిన పరిస్థితి నెలకొంది. రోజురోజుకూ పెరుగుతున్న వాహనాల రద్దీకి తోడు రైల్వే గేటు సమస్య తోడవడంతో ప్రయాణికులు నిత్యం ట్రాఫిక్ చిక్కుల్లో పడుతున్నారు.రైలు రాకపోకల సమయంలో ప్రతిసారీ గేటు మూసివేయడంతో వాహనాల రాకపోకలు పూర్తిగా నిలిచిపోతున్నాయి. దీంతో రహదారికి ఇరువైపులా కిలోమీటర్ల మేర వాహనాలు బారులు తీరుతున్నాయి. ముఖ్యంగా ఉద్యోగులు, విద్యార్థులు, చిరు వ్యాపారులు, నిత్యం ఈ మార్గంలో ప్రయాణించే వారు తీవ్ర ఇబ్బందులు ఎదుర్కొంటున్నారు. అత్యవసర పనులపై వెళ్లేవారు సైతం ట్రాఫిక్‌లో చిక్కుకుని సమయానికి గమ్యస్థానాలకు చేరుకోలేకపోతున్నారు. ప్రయాణ సమయం వృథా కావడంతో పాటు వాహనదారుల సహనానికి ఈ పరిస్థితి పరీక్షగా మారుతోంది.ఈ సమస్యకు శాశ్వత పరిష్కారం చూపేందుకు రైల్వే బ్రిడ్జి నిర్మాణానికి శంకుస్థాపన చేసినప్పటికీ పనులు నత్తనడకన సాగుతుండటంపై స్థానికులు, వాహనదారులు అసహనం వ్యక్తం చేస్తున్నారు. ట్రాఫిక్ సమస్యతో ఏళ్ల తరబడి ఇబ్బందులు పడుతున్నా నిర్మాణ పనుల్లో ఆశించిన వేగం కనిపించడం లేదని ఆవేదన వ్యక్తం చేస్తున్నారు. బ్రిడ్జి నిర్మాణం పూర్తయితే రైల్వే గేటు వద్ద ఎదురవుతున్న ట్రాఫిక్ సమస్యకు పరిష్కారం లభిస్తుందని ఆశాభావం వ్యక్తం చేస్తున్నారు.సంబంధిత అధికారులు, ప్రజాప్రతినిధులు స్పందించి రైల్వే బ్రిడ్జి నిర్మాణ పనులను వేగవంతం చేసి వీలైనంత త్వరగా పూర్తి చేయాలని ప్రజలు కోరుతున్నారు. నిత్యం వేలాది మంది ప్రయాణించే ఈ ప్రధాన రహదారిపై ట్రాఫిక్ సమస్యకు శాశ్వత పరిష్కారం చూపాలని విజ్ఞప్తి చేస్తున్నారు.
