యాదవుల ఐక్యతకు సదర్ సమ్మేళనం వేదిక
సంస్కృతి, సంప్రదాయాల పరిరక్షణకు కృషి చేయాలి: ఎమ్మెల్యే కుంభం
యాదాద్రి:యాదవ సమాజ ఐక్యతను చాటుతూ సంస్కృతి, సంప్రదాయాలను భావితరాలకు అందించేందుకు సదర్ సమ్మేళనాలు దోహదపడతాయని భువనగిరి ఎమ్మెల్యే కుంభం అనిల్కుమార్రెడ్డి అన్నారు. పట్టణంలోని ప్రభుత్వ జూనియర్ కళాశాల మైదానంలో శ్రీకృష్ణ యాదవ సంఘం జిల్లా కమిటీ ఆధ్వర్యంలో నిర్వహించిన సదర్ సమ్మేళనానికి ఆయన ముఖ్య అతిథిగా హాజరయ్యారు. యాదవ సోదరులకు శుభాకాంక్షలు తెలిపారు.ఈ సందర్భంగా ఆయన మాట్లాడుతూ.. సమాజంలోని ప్రతి ఒక్కరూ కుల, ప్రాంత భేదాలకు అతీతంగా ఐకమత్యంతో ముందుకు సాగాలని పిలుపునిచ్చారు. సామాజిక ఐక్యతతోపాటు విద్య, ఆర్థిక, రాజకీయ రంగాల్లోనూ అభివృద్ధి సాధించాలని ఆకాంక్షించారు. సంప్రదాయాలను కాపాడుకుంటూనే అభివృద్ధిలో భాగస్వాములు కావాలని సూచించారు.కార్యక్రమంలో మున్సిపల్ ఛైర్పర్సన్ తంగళ్లపల్లి శ్రీవాణి-రవికుమార్, వైస్ ఛైర్పర్సన్ పోతంశెట్టి మంజుల-వెంకటేశ్వర్లు, సీనియర్ కాంగ్రెస్ నాయకులు, పట్టణ కాంగ్రెస్ అధ్యక్షుడు కూర వెంకటేష్, ప్రజాప్రతినిధులు, కౌన్సిలర్లు, కోఆప్షన్ సభ్యులు, శ్రీకృష్ణ యాదవ సంఘం జిల్లా కమిటీ సభ్యులు, యాదవ సోదరులు పాల్గొన్నారు.