సిరిసిల్ల రెండో బైపాస్లో ఆర్టీసీ బస్సు-కారు ఢీ.. ఇద్దరికి తీవ్ర గాయాలు!
సూర్య రాజన్న సిరిసిల్ల :రాజన్న సిరిసిల్ల జిల్లా కేంద్రంలోని రెండో బైపాస్ రోడ్డులో ఆదివారం ఉదయం ఘోర రోడ్డు ప్రమాదం చోటుచేసుకుంది.చంద్రంపేట చౌరస్తా సమీపంలో సిరిసిల్ల డిపోకు చెందిన ఆర్టీసీ బస్సు, కారు బలంగా ఢీకొన్నాయి.ఈ ప్రమాదంలో కారులో ప్రయాణిస్తున్న ఇద్దరు తీవ్రంగా గాయపడ్డారు.వేములవాడ మండలం మారుపాకలో జరిగిన వివాహ వేడుకలో పాల్గొని తిరిగి వస్తుండగా ఈ ప్రమాదం జరిగినట్లు తెలిసింది.ఉదయం వేళ పొగమంచు కారణంగా ఎదురుగా వస్తున్న వాహనాలు సరిగా కనిపించకపోవడం ప్రమాదానికి కారణమై ఉండవచ్చని స్థానికులు భావిస్తున్నారు.ప్రమాద తీవ్రతకు కారు ముందు భాగం పూర్తిగా నుజ్జునుజ్జు కాగా, ఆర్టీసీ బస్సు ముందు టైరు ధ్వంసమైంది. కారులో ఒకరు బయటకు పడిపోగా,డ్రైవర్ సీటులోనే ఇరుక్కుపోయాడు.సమాచారం అందుకున్న 108 అంబులెన్స్ సిబ్బంది ఘటనా స్థలానికి చేరుకుని స్థానికుల సహాయంతో బయటకు తీశారు.తీవ్రంగా గాయపడిన వారిని చికిత్స నిమిత్తం సిరిసిల్ల ప్రభుత్వ ఏరియా ఆసుపత్రికి తరలించారు.సమాచారం అందుకున్న పోలీసులు ఘటనా స్థలానికి చేరుకుని సహాయక చర్యలు చేపట్టారు.
.