వృద్ధురాలి అనుమానాస్పద మృతి - తిమ్మాపూర్ మండలంలో సంచలనం

సూర్య,తిమ్మాపూర్ :తిమ్మాపూర్ మండలం వచ్చనూరు గ్రామంలో సోమవారం తీవ్ర విషాదం నెలకొంది.గ్రామానికి చెందిన ఉప్పులేటి లచ్చవ్వ (65) అనే వృద్ధురాలు అనుమానాస్పద స్థితిలో శవమై కనిపించడం స్థానికంగా సంచలనం సృష్టించింది.ఆమె ఒంటిపై ఉన్న బంగారు ఆభరణాలు మాయమవ్వడంతో, గుర్తుతెలియని దుండగులు బంగారం కోసమే లచ్చవ్వను హత్య చేసి ఉంటారని కుటుంబ సభ్యులు, గ్రామస్థులు బలంగా అనుమానిస్తున్నారు.సమాచారం అందుకున్న తిమ్మాపూర్ సీఐ అనిల్, ఎస్సై అరుణ్ తక్షణమే సంఘటనా స్థలానికి చేరుకుని పరిస్థితిని సమీక్షించారు.ఘటనా స్థలంలో క్లూస్ టీమ్ వేలిముద్రలు, ఇతర కీలక ఆధారాలను సేకరించింది. బంగారం కోసం జరిగిన హత్యేనా..? లేక దీని వెనుక మరేదైనా కారణం ఉందా..? అనే కోణాల్లో పోలీసులు దర్యాప్తు వేగవంతం చేశారు.పోస్టుమార్టం నివేదిక, పోలీసుల విచారణ పూర్తి అయితే కానీ ఈ మృతికి సంబంధించిన పూర్తి వివరాలు వెలుగులోకి వచ్చే అవకాశం ఉంది.