సెన్సార్ బోర్డు కొత్త నిబంధనలు: చిత్ర పరిశ్రమకు షాకిచ్చిన సీబీఎఫ్‌సీ తాజా మార్గదర్శకాలు!
సూర్య ఎంటర్‌టైన్‌మెంట్ డెస్క్: భారతీయ చలనచిత్ర పరిశ్రమకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్‌సీ) తాజాగా అత్యంత కఠినమైన నిబంధనలను జారీ చేసింది. సినిమాల విడుదలకు ముందు తీసుకోవాల్సిన సెన్సార్ సర్టిఫికేషన్ ప్రక్రియలో భాగంగా నిర్మాతలు ఇకపై మరింత అప్రమత్తంగా ఉండాలని బోర్డు స్పష్టం చేసింది. సినిమా ప్రదర్శన కోసం దరఖాస్తు చేసుకునే సమయానికి చిత్రానికి సంబంధించిన ప్రతి అంశం పూర్తిగా సిద్ధంగా ఉండాలని, లేనిపక్షంలో దరఖాస్తులు తిరస్కరణకు గురయ్యే అవకాశం ఉందని హెచ్చరించింది. ఈ తాజా మార్గదర్శకాలు సినీ వర్గాల్లో తీవ్ర చర్చకు దారితీశాయి.
కొత్త నిబంధనల ప్రకారం, నిర్మాతలు సెన్సార్ సర్టిఫికేట్ కోసం దరఖాస్తు చేసే సమయంలో సమర్పించే కాపీ పూర్తిగా తుది రూపంలో ఉండాలి. చిత్రంలోని గ్రాఫిక్స్, టైటిల్స్, క్రెడిట్స్, సబ్‌టైటిల్స్, డిస్ క్లైమర్స్, సెన్సార్ సర్టిఫికేట్ స్లేట్లు అలాగే బ్యాక్‌గ్రౌండ్ మ్యూజిక్ వంటి అన్ని టెక్నికల్ అంశాలు వంద శాతం పూర్తయిన తర్వాతే సీబీఎఫ్‌సీకి ఫైల్ చేయాల్సి ఉంటుంది. ఎడిటింగ్ పనులు పూర్తికాకుండా లేదా అసంపూర్తిగా ఉన్న ప్రింట్లను సమర్పిస్తే బోర్డు వాటిని పరిశీలించదని, తద్వారా దరఖాస్తులు వెనక్కి వెళ్లే లేదా ఆలస్యం అయ్యే ప్రమాదం ఉందని స్పష్టం చేశారు. ముందుగా ప్రకటించిన విడుదల తేదీల ఆధారంగా సెన్సార్ ప్రక్రియను వేగవంతం చేయలేమని, నిబంధనల ప్రకారమే దరఖాస్తులను పరిశీలిస్తామని తేల్చిచెప్పారు.
సినిమాల టైటిల్స్ విషయంలోనూ సీబీఎఫ్‌సీ మరింత కఠినంగా వ్యవహరించాలని నిర్ణయించింది. సర్టిఫికేషన్ పూర్తికాకముందే చిత్రాల టైటిల్స్‌ను బహిరంగంగా ప్రచారం చేసుకోవద్దని నిర్మాతలకు సూచించింది. సినిమా కథ, కంటెంట్‌తో పాటు టైటిల్స్ ఎవరి మనోభావాలను దెబ్బతీసేలా లేదా వివాదాస్పదంగా ఉండకూడదని స్పష్టం చేసింది. డిజిటల్ విధానంలో పారదర్శకతను పెంచేందుకు ఈ కొత్త మార్గదర్శకాలు ఎంతగానో దోహదపడతాయని బోర్డు భావిస్తోంది. ఏదేమైనప్పటికీ, నిర్మాణ దశలోనే అన్ని పనులను పూర్తి చేసుకుని ముందస్తుగా సెన్సార్‌కు దరఖాస్తు చేసుకోవడం ద్వారా అనవసరమైన జాప్యాన్ని నివారించవచ్చని ట్రేడ్ నిపుణులు అభిప్రాయపడుతున్నారు.
Also Read: ఓటీటీలోకి విజయ్ దేవరకొండ ‘రణబాలి’: నెట్‌ఫ్లిక్స్ పొరపాటుతో లీకైన స్ట్రీమింగ్ డేట్!
