andhrapradesh
వాతావరణ పరిస్థితులకు అనుగుణంగా పంటల బీమా
అమరావతి:రాష్ట్రంలో రైతాంగానికి సాగు భద్రత కల్పించడమే లక్ష్యంగా పంటల బీమా పథకం అమలుపై ముఖ్యమంత్రి నారా చంద్రబాబు నాయుడు ఉన్నత స్థాయి సమీక్ష నిర్వహించారు. ప్రకృతి విపత్తులు, మారిన వాతావరణ పరిస్థితులకు అనుగుణంగా ప్రణాళికాబద్ధంగా పంటల బీమా వర్తింపజేయాలని ఆయన అధికారులను ఆదేశించారు.
వేరుశనగ, పత్తి, టమోటా వంటి ప్రధాన వాణిజ్య పంటలకు కూడా విస్తృతంగా బీమా సౌకర్యం కల్పించినట్లు ఈ సందర్భంగా బీమా కంపెనీల ప్రతినిధులు సీఎంకు నివేదించారు. ప్రభుత్వం తరఫున అందజేస్తున్న ఇన్‌పుట్ సబ్సిడీకి అదనంగా పంటల బీమా పరిహారం సమయానికి అందేలా చర్యలు తీసుకుంటున్నామని అధికారులు వివరించారు. ప్రతి రైతు ఎక్కడా నష్టపోకుండా పంటల బీమా చేసుకునేలా వారిని చైతన్యపరచాలని, ఈ దిశగా అవగాహన కార్యక్రమాలు నిర్వహించాలని ముఖ్యమంత్రి స్పష్టం చేశారు.
