విద్యుద్ఘాతంతో పాడి గేదె మృతి

మాడ్గులపల్లి,మేజర్ న్యూస్:

మండలం లోని అభంగాపురం గ్రామంలో విద్యుద్ఘాతానికి గురై పాడి గేదె మరణించిన సంఘటన ఆలస్యంగా వెలుగులోకి వచ్చింది.బాధితుడు, గ్రామస్థులు తెలిపిన వివరాల ప్రకారం అభంగాపురం గ్రామానికి చెందిన పగిడిపల్లి వీరయ్యకు చెందిన పాడి గేదె ఆదివారం గ్రామంలోని సుదర్శన్ రెడ్డి పొలం వద్ద మేతకు వెళ్లింది. ఈ క్రమంలో అక్కడే ప్రమాదవశాత్తు తెగి వేలాడుతున్న విద్యుత్తు తీగలు తగలడంతో గేదెకు విద్యుద్ఘాతం తగిలి అక్కడికక్కడే మృతి చెందింది.పాడి గేదె చనిపోవడంతో తనకు సుమారు లక్ష రూపాయల వరకు నష్టం వాటిల్లిందని, కుటుంబానికి జీవన ఆధారం కోల్పోయామని బాధితుడు వీరయ్య ఆవేదన వ్యక్తం చేశారు. ప్రమాదానికి కారణమైన విద్యుత్తు తీగలను సరిచేసి, ప్రభుత్వం, విద్యుత్తు శాఖ అధికారులు స్పందించి తనకు తగిన పరిహారం అందించి ఆదుకోవాలని వీరయ్య కోరుతున్నారు.