విద్యాసంస్థల్లో వసతులు మెరుగుపర్చాలి రామాయంపేటలో కేజీబీవీ, మోడల్‌, జెడ్పీ పాఠశాలల్లో ఎమ్మెల్సీ కొమరయ్య పరిశీలన
సూర్య డెస్క్
ప్రభుత్వ విద్యాసంస్థల్లో విద్యార్థులకు నాణ్యమైన విద్యతోపాటు మెరుగైన మౌలిక వసతులు కల్పించడంపై ప్రత్యేక దృష్టి సారించాలని తెలంగాణ శాసనమండలి బీజేపీ డిప్యూటీ ఫ్లోర్‌ లీడర్‌, ఎమ్మెల్సీ మల్క కొమరయ్య అన్నారు. రామాయంపేటలోని కస్తూర్బా గాంధీ బాలికల గురుకుల పాఠశాల, మోడల్‌ స్కూల్‌, జిల్లా పరిషత్‌ పాఠశాలలను ఆయన సందర్శించారు.ఈ సందర్భంగా విద్యార్థులతో మాట్లాడి విద్యాబోధన, పాఠశాలల్లో ఎదుర్కొంటున్న సమస్యలను అడిగి తెలుసుకున్నారు. తాగునీరు, పారిశుధ్యం, పరిశుభ్రత, ఇతర మౌలిక వసతులను పరిశీలించారు. విద్యార్థులు ప్రశాంతమైన, పరిశుభ్రమైన వాతావరణంలో చదువుకునేలా అవసరమైన సదుపాయాలు కల్పించాలన్నారు.
పాఠశాలల్లో తన దృష్టికి వచ్చిన సమస్యలను ప్రభుత్వం, సంబంధిత అధికారుల దృష్టికి తీసుకెళ్లి పరిష్కారానికి కృషి చేస్తానని తెలిపారు. ప్రభుత్వ పాఠశాలలు, కేజీబీవీలు, గురుకులాల్లో పనిచేస్తున్న టీచింగ్‌, నాన్‌ టీచింగ్‌ సిబ్బంది సమస్యలను కూడా ప్రభుత్వం దృష్టికి తీసుకెళ్లి పరిష్కారానికి కృషి చేస్తానని ఎమ్మెల్సీ కొమరయ్య పేర్కొన్నారు.
