విద్యార్థుల జీవితాలతో ఆడుకోవద్దు వర్క్ అడ్జస్ట్మెంట్ ఉత్తర్వులను నిలిపివేయాలి
కొల్చారం ...,ప్రభుత్వ పాఠశాలల్లో మెరుగైన విద్య, నాణ్యమైన బోధన అందుతుందనే నమ్మకంతో తమ పిల్లలను చేర్పిస్తే, వర్క్ అడ్జస్ట్మెంట్, డిప్యూటేషన్ పేరుతో ఉపాధ్యాయులను ఇతర పాఠశాలలకు, మండలాలకు పంపిస్తూ విద్యార్థుల భవిష్యత్తుతో అధికారులు చెలగాటమాడుతున్నారని తల్లిదండ్రులు ఆవేదన వ్యక్తం చేశారు.
ఈ మేరకు సోమవారం కలెక్టరేట్లో నిర్వహించిన ప్రజావాణిలో జిల్లా అదనపు కలెక్టర్ నగేష్కు ఫిర్యాదు అందజేశారు. కొల్చారం మండల కేంద్రంలోని జిల్లా పరిషత్ ఉన్నత పాఠశాల ఉపాధ్యాయుల వర్క్ అడ్జస్ట్మెంట్ ఉత్తర్వులను వెంటనే నిలిపివేయాలని కోరుతూ వినతిపత్రం సమర్పించారు.తల్లిదండ్రుల ఫిర్యాదుపై స్పందించిన అదనపు కలెక్టర్ నగేష్, జిల్లా విద్యాధికారి రాజును ఈ వ్యవహారాన్ని పునఃపరిశీలించాలని, విద్యార్థులకు ఎలాంటి ఇబ్బందులు కలగకుండా చూడాలని ఆదేశించారు.
ఈ కార్యక్రమంలో ఎండీ ఖదీర్, బాల్రాజ్, శ్రీశైలం, సత్యనారాయణ, యాదగిరి, నాగరాజు, ఆంజనేయులు, కృష్ణ, శ్రీనివాస్ తదితరులు పాల్గొన్నారు.