24న పుల్లూరుబండపై సామూహిక సత్యనారాయణ వ్రతాలు
సిద్దిపేట రూరల్, ;. న్యూస్:కార్తీక పౌర్ణమిని పురస్కరించుకొని పుల్లూరుబండ శ్రీ లక్ష్మీనరసింహస్వామి దివ్యక్షేత్రంలో ఈ నెల 24న సామూహిక సత్యనారాయణ వ్రతాలు నిర్వహించనున్నట్లు క్షేత్ర వంశపారంపర్య అర్చకులు తెలిపారు. ఉదయం జరిగే ఈ కార్యక్రమంలో తులసీ కల్యాణంతో పాటు ప్రత్యేక పూజలు నిర్వహించనున్నారు.ఈ సందర్భంగా అర్చకులు కలకుంట్ల వెంకట నర్సింహాచార్యులు, కృష్ణమాచార్యులు, రంగాచారి, చిలకమర్రి వెంకట రమణాచార్యులు, శేషుకుమార్, హరినాథ్, గౌతమ్లతో పాటు గ్రామ సర్పంచ్ కుంచం లత వెంకట్, మాజీ సర్పంచులు తిరుపతిరెడ్డి, నరేష్ గౌడ్, దేశిట్టి తిరుపతి, యాదగిరి, కనక మల్లేశం తదితరులు వ్రతాల కరపత్రాన్ని మంగళవారం ఆవిష్కరించారు.ఈ సందర్భంగా అర్చకులు మాట్లాడుతూ కార్తీక మాసంలో దైవారాధన, దీపారాధన, పూజలు నిర్వహించడం ఎంతో పుణ్యప్రదమని తెలిపారు. భక్తుల్లో ఆధ్యాత్మిక చింతన, భక్తిభావాన్ని పెంపొందించేందుకు ప్రతి ఏటా పుల్లూరుబండ క్షేత్రంలో సామూహిక సత్యనారాయణ వ్రతాలు నిర్వహిస్తున్నట్లు పేర్కొన్నారు. ఈ పవిత్ర కార్యక్రమంలో గ్రామ ప్రజలతో పాటు పరిసర ప్రాంతాల భక్తులు పెద్ద సంఖ్యలో పాల్గొని స్వామివారి కృపకు పాత్రులు కావాలని కోరారు. వ్రతంలో పాల్గొనే దంపతులు రూ.301 చెల్లించి రశీదు పొందాలని నిర్వాహకులు సూచించారు.