వెనుకబడిన విద్యార్థులపై ప్రత్యేక శ్రద్ధ చూపాలి : కలెక్టర్

సూర్య – పెద్దపల్లి:

ప్రభుత్వ ఉన్నత పాఠశాలల్లో విద్యా ప్రమాణాలను మరింత మెరుగుపరిచేందుకు ఉపాధ్యాయులు, అధికారులు సమన్వయంతో కృషి చేయాలని జిల్లా కలెక్టర్ కోయ శ్రీహర్ష ఆదేశించారు. గురువారం సమీకృత జిల్లా కలెక్టరేట్‌లో అకడమిక్ ప్యానెల్ బృందాలతో పాఠశాలల విద్యా ప్రగతిపై సమీక్ష నిర్వహించారు. ఓరల్ రీడింగ్ ఫ్లూఎన్సీ అభివృద్ధికి నిర్వహిస్తున్న రెమెడియేషన్ తరగతులపై సంతృప్తి వ్యక్తం చేశారు. డిజిటల్ బోర్డులు, బోధనా అభ్యసన సామగ్రిని సమర్థవంతంగా వినియోగించాలని సూచించారు. చదువులో వెనుకబడిన విద్యార్థులను గుర్తించి అదనపు శిక్షణ అందించాలని, ప్రధానోపాధ్యాయులు తరగతులను నిరంతరం పర్యవేక్షించాలని ఆదేశించారు. విద్యార్థుల్లో చదవడం, రాయడం, గణిత నైపుణ్యాలు పెంపొందించేలా బోధన సాగాలని సూచించారు. సమావేశంలో డీఈవో జి.శారద, ఏఎంఓ డా.పి.ఎం. షేక్, అకడమిక్ ప్యానెల్ సభ్యులు, అధికారులు పాల్గొన్నారు.