వీణవంకకు కొత్త సహకార సంఘం..
సూర్య వీణవంక: రైతులకు మరింత చేరువగా సహకార సంఘాల సేవలను అందించేందుకు ప్రభుత్వం కొత్తగా సహకార సంఘాలను ఏర్పాటు చేసేందుకు చర్యలు చేపడుతోంది. ఇందులో భాగంగా కరీంనగర్ జిల్లాలో ప్రస్తుతం ఉన్న సహకార సంఘాలకు అదనంగా ఏడు కొత్త సంఘాలను ఏర్పాటు చేయడానికి అధికారులు ప్రతిపాదనలు సిద్ధం చేశారు.కొత్తగా ఏర్పాటు కానున్న సంఘాల జాబితాలో చల్లూరు (వీణవంక) కూడా ఉండడంతో మండలంలోని రైతులకు సహకార సేవలు మరింత అందుబాటులోకి రానున్నాయి. పెద్దగా ఉన్న సహకార సంఘాలను పునర్వ్యవస్థీకరించి కొత్త సింగిల్ విండోలను ఏర్పాటు చేయడం ద్వారా రైతులకు పంట రుణాలు, వ్యవసాయానికి సంబంధించిన సేవలు, ఇతర సహకార కార్యక్రమాలు స్థానికంగానే అందే అవకాశం ఏర్పడనుంది.రైతులు వడ్డీ వ్యాపారులపై ఆధారపడకుండా తక్కువ వడ్డీకి రుణాలు పొందేందుకు సహకార సంఘాలు కీలకంగా పనిచేస్తున్నాయి. కొత్త సంఘాల ఏర్పాటుతో రైతులకు రుణాలు, ఎరువులు, విత్తనాలు తదితర వ్యవసాయ అవసరాలకు సంబంధించిన సేవలు మరింత సులభంగా అందే అవకాశం ఉంది.
ఉమ్మడి కరీంనగర్ జిల్లాలో మొత్తం 25 కొత్త సహకార సంఘాలను ఏర్పాటు చేయాలని ప్రభుత్వం నిర్ణయించగా, కరీంనగర్ జిల్లాలో ఏడు సంఘాలు ఏర్పాటు కానున్నాయి. ఇందులో వీణవంక మండలానికి చెందిన చల్లూరు సహకార సంఘం కూడా ఉండటంతో స్థానిక రైతుల్లో ఆశలు నెలకొన్నాయి.