ఉద్యోగులకు 17 శాతం హెచ్‌ఆర్‌ఏ అమలుకు ప్రతిపాదనలు పంపిస్తాం - కలెక్టర్ చిత్రా మిశ్రా హామీ

సూర్య కరీంనగర్ : నగరపాలక సంస్థ పరిధికి 8 కిలోమీటర్ల పరిధిలోని గ్రామాల్లో పనిచేస్తున్న ప్రభుత్వ ఉద్యోగులు, ఉపాధ్యాయులకు హెచ్‌ఆర్‌ఏను తిరిగి 11 శాతం నుంచి 17 శాతానికి పెంచాలని కోరుతూ ఉద్యోగ సంఘాల జేఏసీ నాయకులు జిల్లా కలెక్టర్ చిత్రా మిశ్రాకు వినతిపత్రం అందజేశారు. జేఏసీ చైర్మన్ దారం శ్రీనివాస్ రెడ్డి, కన్వీనర్ మడిపల్లి కాళీ చరణ్ గౌడ్ ఆధ్వర్యంలో నాయకులు కలెక్టర్‌ను కలిసి ఉద్యోగులకు జరుగుతున్న ఆర్థిక నష్టాన్ని వివరించారు. గతంలో సర్వే ఆధారంగా 21 గ్రామాలకు 17 శాతం హెచ్‌ఆర్‌ఏ అమలు చేస్తూ ఉత్తర్వులు జారీ చేసినప్పటికీ, ప్రస్తుతం తిరిగి 11 శాతానికి తగ్గించారని తెలిపారు. దీనిపై స్పందించిన కలెక్టర్ ప్రభుత్వ రాటిఫికేషన్ కోసం అవసరమైన ప్రతిపాదనలు పంపించి, సమస్య పరిష్కారానికి కృషి చేస్తానని హామీ ఇచ్చారు. ఈ కార్యక్రమంలో వివిధ ఉద్యోగ సంఘాల నాయకులు, ప్రతినిధులు పాల్గొన్నారు.