తవక్కల్ విద్యాసంస్థలపై చర్యలు తీసుకోవాలి. • మంత్రి వివేక్‌, ఎంపీ వంశీకృష్ణకు AISB ఫిర్యాదు
సూర్య, మంచిర్యాల టౌన్ : దసరా సెలవుల్లోనూ పాఠశాలలు నిర్వహించడంతో పాటు, ప్రశ్నించిన వారిపై దురుసుగా ప్రవర్తించి, తప్పుడు కేసులు పెట్టించారంటూ తవక్కల్ విద్యాసంస్థల యాజమాన్యంపై AISB నాయకులు ఫిర్యాదు చేశారు. ఈ మేరకు రాష్ట్ర కార్మిక, గనుల శాఖ మంత్రి గడ్డం వివేక్‌ వెంకటస్వామి, పెద్దపల్లి ఎంపీ గడ్డం వంశీకృష్ణకు వినతిపత్రాలు అందజేసినట్లు AISB జిల్లా ప్రధాన కార్యదర్శి కనుకుంట్ల సన్నీ గౌడ్ తెలిపారు.
ప్రభుత్వ ఆదేశాల ప్రకారం దసరా సెలవుల్లో పాఠశాలలు నిర్వహించకూడదని స్పష్టం చేసినప్పటికీ, నిబంధనలకు విరుద్ధంగా తవక్కల్ విద్యాసంస్థలను నడిపించారని ఫిర్యాదులో పేర్కొన్నారు. ఈ విషయాన్ని ప్రశ్నించేందుకు వెళ్లిన వారిపై దుర్భాషలాడటంతో పాటు, భౌతిక దాడులకు పాల్పడి, తప్పుడు కేసులు పెట్టించారని ఆరోపించారు.
కాంగ్రెస్ పార్టీ, మంత్రి, ఎంపీల పేర్లను ప్రస్తావిస్తూ అజమాయిషీ చెలాయిస్తున్నారని ఆరోపించిన AISB నాయకులు, సదరు వ్యక్తిపై పార్టీ పరంగా క్రమశిక్షణా చర్యలు తీసుకోవాలని కోరారు. నిబంధనలు ఉల్లంఘించిన పాఠశాలలపై విచారణ జరిపి, బాధ్యులపై చట్టపరమైన చర్యలు తీసుకోవడంతో పాటు, అవసరమైతే పాఠశాలలను మూసివేయాలని విజ్ఞప్తి చేశారు.
