సోనియా గాంధీ ఆత్మకథ ఆధారంగా తెలుగు సినిమా తీస్తా: జగ్గారెడ్డి

సంగారెడ్డి : కాంగ్రెస్ అగ్రనేత సోనియాగాంధీ స్వయంగా రచించిన ‘బిలాంగింగ్: ఎ జర్నీ ఆఫ్ లవ్’ పుస్తకం ఆధారంగా ఆమె జీవిత చరిత్రను తెలుగులో సినిమాగా తెరకెక్కిస్తానని టీపీసీసీ వర్కింగ్ ప్రెసిడెంట్ జగ్గారెడ్డి ప్రకటించారు. సంగారెడ్డిలో నిర్వహించిన కాంగ్రెస్ పార్టీ కార్యకర్తల సమావేశంలో ఆయన ఈ కీలక ప్రకటన చేశారు. ఈ సినిమాకు సంగారెడ్డి నియోజకవర్గ కాంగ్రెస్ నాయకులు, కార్యకర్తలే నిర్మాతలుగా వ్యవహరించాలని కోరారు. ఈ సందర్భంగా సినిమా నిర్మాణానికి రూ.2 కోట్లు అందజేస్తానని నియోజకవర్గ కాంగ్రెస్ కన్వీనర్ జులకంటి ఆంజనేయులు ప్రకటించారు.

50 మందితో ప్రత్యేక కమిటీ

సినిమా నిర్మాణ ప్రక్రియను ముందుకు తీసుకెళ్లేందుకు 50 మందితో ప్రత్యేక కమిటీ ఏర్పాటు చేస్తామని జగ్గారెడ్డి తెలిపారు. ఈ కమిటీని గాంధీభవన్ పీఆర్వో హరిప్రసాద్ పర్యవేక్షిస్తారని వెల్లడించారు. నాయకులు, కార్యకర్తలు నిధులు సిద్ధం చేసుకోవాలని కోరారు. ఎన్నికలకు ఖర్చు పెట్టినట్లుగానే ఈ సినిమాకు కూడా ఖర్చు చేయాలని, అవసరమైన బడ్జెట్ సమీకరించి మంచి దర్శకుడిని ఎంపిక చేద్దామని అన్నారు. అన్ని ఏర్పాట్లు పూర్తయిన అనంతరం ముఖ్యమంత్రి రేవంత్‌రెడ్డి, పీసీసీ అధ్యక్షుడు మహేశ్‌కుమార్‌ గౌడ్‌ను ఆహ్వానించి వారి చేతుల మీదుగా సినిమా షూటింగ్ ప్రారంభిస్తామని తెలిపారు. సోనియాగాంధీ జీవితాన్ని కార్యకర్తలు మరింతగా తెలుసుకునేందుకు ఆమె రచించిన పుస్తక ప్రతులను తెప్పించి పంపిణీ చేస్తామని చెప్పారు.

కుటుంబ జీవితం నుంచి రాజకీయ ప్రస్థానం వరకు

ఇందిరాగాంధీ కోడలిగా, రాజీవ్‌గాంధీ భార్యగా, రాహుల్‌గాంధీ, ప్రియాంకాగాంధీల తల్లిగా సోనియాగాంధీ జీవితంలోని వివిధ ఘట్టాలను సినిమాలో ఆవిష్కరిస్తామని జగ్గారెడ్డి తెలిపారు. ఇందిరాగాంధీ, రాజీవ్‌గాంధీల హత్యలతో ఆ కుటుంబం ఎదుర్కొన్న విషాదం, అనంతరం సోనియాగాంధీ ఎదుర్కొన్న సవాళ్లు, పిల్లల పెంపకం, ఆమె రాజకీయ ప్రయాణాన్ని ప్రజలకు తెలియజేస్తామని పేర్కొన్నారు. అనేక మతాలు, కులాలు, భాషలతో కూడిన భారతదేశంలో సోనియాగాంధీ ప్రత్యేక గుర్తింపు సంపాదించుకున్నారని అన్నారు. సముద్రం ఎంత లోతుగా ఉంటుందో కాంగ్రెస్ పార్టీ రాజకీయ వ్యవస్థ కూడా అంతటి లోతైనదని, ఆ రాజకీయ వ్యవస్థను సోనియాగాంధీ అధ్యయనం చేశారని వ్యాఖ్యానించారు.

 ప్రధాని పదవిని వదులుకోవడం చరిత్ర

సోనియాగాంధీకి ప్రధాని పదవిపై ఎలాంటి వ్యామోహం లేదని జగ్గారెడ్డి అన్నారు. రాజీవ్‌గాంధీ మరణానంతరం పీవీ నరసింహారావు ప్రధానమంత్రి అయిన సందర్భంలోనూ ఆమె పదవిని ఆశించలేదని పేర్కొన్నారు. యూపీఏ ప్రభుత్వం అధికారంలోకి వచ్చినప్పుడు సోనియాగాంధీని ప్రధానిగా ఉండాలని పార్టీ నాయకులు కోరినా, ఆమె ఆ అవకాశాన్ని వదులుకుని మన్మోహన్‌సింగ్‌కు ప్రధానమంత్రి బాధ్యతలు అప్పగించారని గుర్తుచేశారు. ప్రధాని అయ్యే అవకాశం ఉన్నప్పటికీ ఆ పదవిని స్వీకరించకపోవడం చరిత్రలో నిలిచిపోయే నిర్ణయమని అభిప్రాయపడ్డారు.సోనియాగాంధీ, మన్మోహన్‌సింగ్‌, రాహుల్‌గాంధీల ఆలోచనల నుంచి ఉపాధి హామీ పథకం రూపుదిద్దుకుందని జగ్గారెడ్డి పేర్కొన్నారు. గాంధీ కుటుంబం నుంచి మరోసారి ప్రధానమంత్రి రావాలని ప్రజలు కోరుకుంటున్నారని, రాహుల్‌గాంధీ ప్రధానమంత్రి కావాలనేది సోనియాగాంధీ ఆకాంక్ష అని ఆయన వ్యాఖ్యానించారు.