నీటిని వృధా చేస్తే కఠిన చర్యలు సర్పంచ్ బెట్టరి రేణుక నాగరాజు !
నీటిని వృథా చేస్తే జరిమానా మారకుంటే నల్లా కనెక్షన్ కట్!
ఇంటింటికీ అవగాహన కల్పించిన సర్పంచ్ రేణుక నాగరాజ్
పెద్దకొత్తపల్లి, సూర్య న్యూస్: గ్రామంలో తాగునీటి వృథాను అరికట్టి, నీటి సంరక్షణపై ప్రజల్లో అవగాహన పెంపొందించేందుకు సర్పంచ్ రేణుక నాగరాజ్ ఆధ్వర్యంలో బుధవారం ప్రత్యేక కార్యక్రమం నిర్వహించారు. గ్రామంలోని కాలనీల్లో ఇంటింటికీ తిరుగుతూ నీటిని పొదుపుగా వినియోగించుకోవాలని ప్రజలకు సూచించారు. నీటి వృథాను అరికట్టేందుకు అవగాహన కల్పించారు.ఈ సందర్భంగా సర్పంచ్ రేణుక నాగరాజు మాట్లాడుతూ తాగునీటిని వృథా చేయడం వల్ల ఇతర కుటుంబాలకు ఇబ్బందులు ఎదురవుతాయని తెలిపారు. హెచ్చరికలు చేసినప్పటికీ నీటిని వృథా చేస్తే నిబంధనల ప్రకారం జరిమానాలు విధిస్తామని, అప్పటికీ స్పందించకపోతే నల్లా కనెక్షన్ల తొలగింపునకు చర్యలు తీసుకుంటామని హెచ్చరించారు. ప్రతి ఇంటి వద్ద ఇంకుడు గుంతలు ఏర్పాటు చేసుకుని మురుగునీరు రోడ్లపై నిల్వ ఉండకుండా చూడాలని సూచించారు. గ్రామ పరిశుభ్రత, నీటి సంరక్షణ ప్రతి ఒక్కరి బాధ్యతని పేర్కొన్నారు. ఈ కార్యక్రమంలో గ్రామపంచాయతీ కార్యదర్శి నాగ శేషు, వార్డు సభ్యులు, గ్రామ ప్రజలు పాల్గొన్నారు.
