విద్యార్థులను జంతువులులా చూస్తున్నారు

ఎడ్యుకేషన్ స్టాఫ్ రిపోర్టర్ : ఎస్వీయూ ఆర్ట్స్ విభాగంలో చదువుతున్న విద్యార్థులను వర్సిటీ అధికారులు జంతువులులా పరిగణిస్తున్నారని ఏబీవీపీ నేతలు ఆగ్రహం వ్యక్తం చేశారు. ఈ మేరకు బుధవారం ఎస్వీయూ పరిపాలనా భవనం ఎదుట పెద్ద ఎత్తున నిరసన కార్యక్రమం చేపట్టారు. అనంతరం వారు మాట్లాడుతూ వర్సిటీలో ఆర్ట్స్ విభాగం విద్యార్థులు నివసించే ఈ బ్లాక్ వసతి గృహంలో చిన్న గదిలో నలుగురుని ఇరికించి జంతువుల కంటే హీనంగా చూస్తున్నారని ఆవేదన వ్యక్తం చేశారు. ఈ విషయంపై అధికారులకు విన్నవించినా పట్టించుకోకుండా ప్రశ్నించిన విద్యార్థులపై దౌర్జన్యానికి దిగుతూ బెదిరిస్తున్నారని మండిపడ్డారు. ఈ విషయంపై వీసీ టాటా నర్సింగరావుకు విన్నవించామని త్వరలో కమిటీ వేసి సమస్యలను పరిష్కరిస్తామని హామీ ఇచ్చారని, ప్రిన్సిపల్ భాస్కర్ రెడ్డి సైతం సమస్యలపై స్పందించారని తెలిపారు. విద్యార్థుల సమస్యలను తక్షణం పరిష్కరించకపోతే పెద్ద ఎత్తున పోరాటానికి సిద్ధమవుతామని అధికారులను హెచ్చరించారు. ఈ కార్యక్రమంలో స్టేట్ లాసెల్ కోకన్వీనర్ దివాకర్, యూనివర్సిటీ అధ్యక్షుడు చెన్నకేశవుడు, చామంచి గురు ప్రసాద్ యాదవ్, ఏబీవీపీ నేతలు, విద్యార్థులు పెద్ద సంఖ్యలో పాల్గొన్నారు. 

సీఎం గౌడ్ తిరుపతి స్టాఫ్ రిపోర్టర్