శ్రీ రామకృష్ణ ఇంటర్నేషనల్ సంస్థ తెలంగాణ అధ్యక్షుడిగా మణిదీప్‌
హైదరాబాద్, సూర్య ప్రతినిధి :ప్రముఖ ఆధ్యాత్మిక, సాంస్కృతిక సంస్థ శ్రీరామకృష్ణ ఇంటర్నేషనల్ తెలంగాణ శాఖ అధ్యక్షుడిగా నగరానికి చెందిన ప్రముఖ సేవావేత్త, రెడ్‌క్రాస్‌ సొసైటీ జిల్లా వైస్‌ చైర్మన్‌ వి.మణిదీప్‌ ఎంపికయ్యారు. ఈమేరకు ఆయన శనివారం బీజేపీ తెలంగాణ రాష్ట్ర అధ్యక్షులు ఎన్.రాంచందర్ రావు, శ్రీ రామకృష్ణ ఇంటర్నేషనల్ అధ్యక్షులు గురు శ్రీ మహేందర్ దాస్ మహారాజ్ జీ చేతుల మీదుగా నియామక పత్రాన్ని అందుకున్నారు. అనంతరం వీరి చేతుల మీదుగానే తెలంగాణలో ‘ఘర్ ఘర్ రామ్, హర్ ఘర్ రామాయణ్‌’ కార్యక్రమాన్ని ఆవిష్కరించారు. ఈ సందర్భంగా మణిదీప్‌ మీడియాతో మాట్లాడుతూ శ్రీ రామకృష్ణ ఇంటర్నేషనల్ వంటి సంస్థకు తెలంగాణ అధ్యక్షుడిగా నియమితులవడం ఎంతో గౌరవంగా భావిస్తున్నానని చెప్పారు. తెలంగాణలో సంస్థ సిద్ధాంతాలను, ఆశయాలను వ్యాప్తి చేసేందుకు తనవంతు కృషి చేస్తానని పేర్కొన్నారు. శ్రీరాముడి ఆదర్శాలను, రామాయణం సందేశాన్ని తెలంగాణలోనిప్రతి ఇంటికి చేరేలా అంకితభావంతో పనిచేస్తానని చెప్పారు. ఈ కార్యక్రమంలో బీజేపీ తెలంగాణ ఎండోమెంట్ సెల్ రాష్ట్ర కన్వీనర్ అన్నవజుల సూర్యప్రకాశ్, రాష్ట్ర కో-కన్వీనర్ నిరంజన్ దేశాయ్, బీజేపీ సినిమా సెల్ కన్వీనర్ వైభవ్ సూర్య తదితరులు పాల్గొన్నారు.
